Abagenzi 113 ni bo bari muri iyi ndege ndetse n’abakozi bayikoramo 9, babashije gusohoka mu ndege imaze gufatwa n’inkongi y’umuriro, bamwe barakomereka.
Abagenzi bagera kuri 40 bari mu ndege bakomeretse bajyanwa kwa muganga.
Ni indege ya sosiyete yitwa Tibet Airlines yo mu Bushinwa, yakuwe mu nzira y’izindi ndege mu gitondo kuri uyu wa kane ubwo yafatwaga n’inkongi y’umuriro mbere yo gukora urugendo rwayo ubwo yari ku kibuga cy’indege mpuzamahanga cya Chongqing mu Majyepfo ashyira Uburengerazuba mu Bushinwa.
Ba nyiri indege bavuga ko nta muntu wahasize ubuzima. Indege yiteguraga gukora urugendo iva Chongqing yerekeza Nyingchi mu Ntara yigenga ya Tibet iri mu Majyepfo y’Uburengerazuba bw’ubushinwa.
Impanuka yabaye ahagana saa 8h00 a.m ku isaha yahariya mu Bushinwa.
Sosiyete ya Tibet Airlines yatangaje ko “Ubwo indege yiteguraga guhaguruka, abari bayitwaye babonye ibimenyetso bidasanzwe, bahita bahagarika urugendo. Indege yahise ikurwa mu nzira y’ikibuga.”
Itangazo rivuga ko “Indege yangiritse kubera umuriro.”
Video yashyizwe hanze na televiziyo ya Leta mu Bushinwa, CCTV igaragaza indege iri mu nzira y’ikibuga, irimo gushya, ndetse umutsi mwinshi wuzuye ikirere.
Iyi mpanuka y’indege ikurikiye iyabaye tariki 21 Werurwe, 2022 ubwo Boeing 737-800 yinuye hasi iri mu kirere cy’ahitwa Guangxi mu Majyepfo y’Ubushinwa igahitana abantu 132 bari bayirimo.
Ni impanuka yahitanye umubare munini w’abantu mu Bushinwa mu myaka 30 ishize, nubwo iki gihugu gisanzwe gifite amanota mu kugira umutekano w’indege wizewe.
IVOMO: Bfmtv
UMUSEKE.RW
