Tuyisenge Eric Cantona yahawe inshingano mu Amavubi

Mu mavugurura ari mu Ikipe y’Igihugu y’Umupira w’Amaguru [Amavubi], mu bakozi bashinzwe ibikoresho, hiyongereyemo Tuyisenge Eric uzwi nka Cantona.

Kuri uyu wa Gatanu, nibwo hatangajwe itsinda ry’abatoza n’abandi bose bazaba bafite inshingano mu ikipe y’Igihugu, Amavubi.

Mu mpinduka zakozwe, zageze no mu bakozi bashinzwe ibikoresho muri iyi kipe (Kits Management).

Tuyisenge Eric yari amaze igihe kinini ashinzwe ibikoresho mu makipe y’Igihugu y’Ingimbi [U15, U18, U20 na U23]. Yabaye mu ikipe ya Isonga FA nk’umukozi ndetse aranayikinira.

Cantona yasimbuye Baziki Peter uherutse kwitaba Imana, akazakorana na Munyaneza Jacques uzwi nka Rujugiro.

HABIMANA SADI/UMUSEKE.RW