Ikipe y’Igihugu y’umupira w’amaguru y’Abangavu batarengeje imyaka 20, yatangiye imyitozo itegura imikino ibiri ya Zimbabwe mu gushaka itike y’Igikombe cy’Isi 2026.
Mbere yo gutangira uyu mwiherero, Ubuyobozi bw’Ishyirahamwe ry’Umupira w’Amaguru mu Rwanda, FERWAFA, bwakoze impinduka mu batoza b’ikipe y’Igihugu y’Abangavu batarengeje imyaka 20, uwatoza abanyezamu n’uwari mu bungirije, barasimburwa.
Ku wa 6 Gicurasi 2025, ni bwo hatangiye umwiherero w’ikipe y’Igihugu y’Abangavu batarengeje imyaka 20. Aba baritegura imikino ibiri ya Zimbabwe mu guhutanira itike yo kujya mu Gikombe cy’Isi 2026.
Ni imyitozo ya mbere yayobowe na Casa Mbungo André n’abungiriza be barimo, Mukamusonera Théogenie, Hamida na Ndanda.
Umukino ubanza uzabera i Kigali kuri Kigali Pelé Stadium Saa Cyenda z’amanywa ku wa 11 Gicurasi 2025 mu gihe n’uwo kwishyura ari ho uzabera ku 14 Gicurasi uyu mwaka Saa Cyenda z’amanywa.
Mu itsinda ry’abatoza bari gutoza aba bangavu b’u Rwanda, habayemo impinduka, umutoza w’abanyezamu, Safari Mustafa asimburwa na Ndizeye Aimé Ndanda mu gihe Munyana wari mu bungirije Casa Mbungo, yasimbuwe na Hamida usanzwe atoza abangavu ba APR FC bari munsi y’imyaka 20.
UMUSEKE.RW
