Bamwe mu baturage baturiye uruganda rutunganya Kawa ndetse n’abakora mu buryo bwa nyakabyizi baravuga ko amafaranga bahembwa yazamuye ubukungu n’Imibereho myiza byabo.
Abavuze ibi ni abakora imirimo y’ubushabitsi umunsi ku munsi, ndetse n’abahemberwa imirimo bakoze bakunze kwita ba nyakabyizi mu ruganda abahinga kawa bashinze barwita Abateraninkunga ba Sholi.
Umutoniwase Auréa usanzwe utunzwe n’umwuga w’ubucuruzi yabwiye UMUSEKE ko iyo ikawa yeze abakiriya biyongera bigatuma ubucuruzi bwe bwunguka.
Ati ”Iyo barimo gusarura ikawa ku munsi nshobora gucuruza ibiro 100 by’ibirayi n’amacasiers ya Fanta n’izonga eshanu.”
Umutoniwase avuga ko usibye urwunguko abona mu gihe ikawa yeze, uruganda rwubakiye Ivuriro abaturage bo mu gasanteri ka Sholi n’abatuye mu Midugudu iri hafi na Sholi, uruganda rubegereza amazi meza.
Mukamana Adelphine uhembwa mu buryo bwa Nyakabyizi avuga ko amafaranga amaze kuvana mu mirimo yo gutunganya ikawa mu myaka 10 ahamaze, yayubakishiie inzu abamo aha n’umugabo we wari umaze igihe ari umushomeri igishoro yahereyeho akora ubucuruzi.
Ati ”Twatangiye ubworozi bw’amatungo magufi ubu ba nyakabyizi twese twatangiye kwizigama iyo umwaka urangiye buri wese ahabwa arenga ibihumbi 100Frw cyangwa Frw 200,000 bitewe n’umusanzu umuntu atanga.”
Perezidanti wa Koperative Abateraninkunga ba Sholi avuga ko batangiye Koperative bahuzagurika kandi icyo gihe bahembaga umubare mukeya w’abakoraga mu ruganda.
Ati ”Uko umusaruro w’ikawa wagiye wiyongera ni nako abakozi badufasha gutunganya ikawa biyongereye.”
Uruganda rutunganya ikawa rukoresha ba nyakabyizi 200 hiyongereyeho abakozi 27 b’uruganda bahoraho.
Perezida wa Koperative abateraninkunga ba Shori avuga ko baherutse kugura imashini nshya ikaranga ikawa ku giciro cya miliyoni 69Frw.
MUHIZI ELISÉE
UMUSEKE.RW/Muhanga
