Nyuma yo kwanga kongera amasezerano muri Liverpool, Trent Alexander-Arnold yemeje mu mpera z’uyu mwaka w’imikino, azatandukana na yo, bikaba bivugwa ko ashobora kuzahita yerekeza muri Real Madrid.
Trent wazamukiye mu ishuri ry’abato ry’Umupira w’Amaguru muri Liverpool, amaze iminsi avugwa muri Real Madrid yo muri Espagne.
Uyu musore uri mu beza bakina bakina inyuma ku ruhande rw’iburyo, yemeje ko azatandukana n’ikipe ye Ubwo umwaka w’imikino 2024-25, uzaba urangiye.
Ibi yabitangarije mu kiganiro yagiranye n’abashinzwe Itangazamakuru n’Itumanaho muri Liverpool.
Ati “Nyuma y’imyaka 20 muri Liverpool FC, nzagenda mu mpera z’umwaka w’imikino.”
Uyu musore, bivugwa ko we na Real Madrid, bamaze igihe mu biganiro bimwerekeza muri iyi kipe, cyane ko imukeneye cyane.
Trent yageze muri Liverpool afite imyaka itandatu, ajya mu ishuri rya yo ryigisha ruhago ry’iyi kipe.
Nk’uko byatangajwe n’umunyamakuru, Fabrizio Romano, Trent azasinyira Real Madrid amasezerano y’imyaka itanu.
Uyu mukinnyi w’imyaka 26, yakiniye Liverpool imikino 352. Umukino we wa mbere muri iyi kipe, yawukinnye mu 2016.
Yayitsindiye ibitego 23, atanga imipira 92 yavuyemo ibindi bitego. Yatwaranye na yo ibikombe bibiri bya shampiyona, kimwe cy’Igihugu (FA Cup), kimwe cya League Cup, kimwe gihuza iyegukanye shampiyona n’iyegukanye FA Cup (Community Shield), kimwe cya UEFA Champions League, kimwe cya Super Coupe na kimwe cya Club World Cup.
UMUSEKE.RW
