Mu irushanwa rya “Esperance Football Tournament 2025” riri kubera kuri Tapis Rouge i Nyamirambo, ikipe ya Stella FC irimo Kayitaba Bosco n’abandi biganjemo aba AS Kigali, yatangiye inyagira ibitego 5-2 Buja City y’abanyamahanga.
Ku wa mbere tariki ya 16 Kamena 2025, ni bwo hakomeje imikino y’irushanwa ryateguwe n’umusifuzi mpuzamahanga, Ishimwe Claude “Cucuri.” Iri rushanwa ryiswe “Esperance Football Tournament”, riri kubera ku kibuga cya Tapis Rouge giherereye i Nyamirambo.
Ikipe ya Stella FC irimo abakinnyi benshi ba AS Kigali n’abandi bakina mu cyiciro cya mbere mu yandi makipe, yatangiye neza inyagira ibitego 5-2 Buja City yiganjemo abakomoka i Burundi na Repubulika Iharanira Demokarasi ya Congo.
Ni ibitego byatsinzwe na Habimana Yves watsinzemo ibitego bitatu na Kalisa Rashid watsindiye iyi kipe igitego kimwe na Said Abubakar watsinze kimwe. Nyuma y’umukino, Habimana Yves ni we wahembwe nk’umukinnyi witwaye neza muri uyu mukino (man of the match).
Undi mukino wari wabanje, warangiye ikipe y’abakomoka i Rubavu, Brésil, yatsinze ibitego 3-2 Elevator Gatsibo y’abakomoka mu Akarere ka Gatsibo. Muri uyu mukino, Ishimwe Djabil ni we wahembwe nk’umukinnyi witwaye neza mu mukino.
Irushanwa rya “Esperance Football Tournament”, rigamije gufasha abakinnyi kwigaragaza ngo babone akazi mu gihe abagafite ribafasha kuguma ku rwego rwiza.
UMUSEKE.RW
