Amashyaka atavuga rumwe n’ubutegetsi buriho mu Burundi yatangaje ko amatora yagenze nabi kuko yarimo iterabwoba n’ubujura nyuma y’uko ishyaka CNDD-FDD riri ku butegetsi ryegukanye imyanya yose yo mu Nteko Ishinga Amategeko.
Ni nyuma yuko Komisiyo y’Amatora, CENI, itangaje ibyavuye mu matora yabaye tariki ya 5 Kamena 2025.
Imibare yashyizwe hanze na CENI ku wa 11 Kamena yerekanye ko imyanya yose 100 yahatanirwaga yo mu Nteko Ishinga Amategeko yegukanywe n’ishyaka rya CNDD-FDD riri ku butegetsi.
Imibare igaragaza ko mu barenga miliyoni 5.85 bitabiriye amatora, 96.51% batoye ishyaka rya CNDD_FDD.
Amategeko mu Burundi avuga ko kugira ngo ishyaka ribone umwanya mu Nteko Ishinga Amategeko rigomba kuba ryarabonye amajwi 2%.
Ibyavuye mu matora byerekanye ko ishyaka UPRONA ryagize amajwi 1,38%. Andi mashyaka yo ntayabashije gushyitsa ijwi rimwe.
Prosper Ntahorwamiye uyobora CENI ati “Nta rindi shyaka ryabashije kurenga uwo murongo , ibyatumye CNDD_FDD itsindira intebe zose mu Ntwko Ishinga Amategeko.”
Amashyaka atavuga rumwe n’ubutegetsi yagaragaje ko aya matora yagenze nabi, ngo ko habayemo byinshi binyuranyije n’amategeko.
Umuyobozi w’ishyaka UPRONA, Olivier Nkurunziza, yavuze ko amatora yarimo ubujura no gutera ubwoba abaturage bikozwe n’Imbonerakure.
Ati “Kuri Perezida wa Repubulika [ Evariste Ndayishimiye] turamusaba gufata ingamba zihuse zo kurengera demokarasi iri mu kaga, ashingiye ku buryo amatora yagenze.”
Umuryango Ushinzwe kubahiriza uburenganzira bwa Muntu mu Burundi wo uvuga ko hari ibitaragenze neza mu matora ko ariko muri rusange yagenze neza mu makomine yose.
Inteko Ishinga Amategeko mu Burundi izaba igizwe n’abadepite 111. hakazatorwa abandi 11 hashingiwe ku ihame ry’uburinganire bw’abagore n’abagabo ndetse n’amoko.
MUGIRANEZA THIERRY
UMUSEKE.RW
