Ikipe y’abahoze bakinira ikipe y’Igihugu, Amavubi, izwi ku izina rya “FAPA”, yageze ku mukino wa nyuma w’irushanwa ryo Kwibuka ku nshuro ya 31 Jenoside yakorewe Abatutse muri Mata 1994, nyuma yo gutsinda iy’abafana ba Arsenal izwi ku izina rya “Forever FC” ibitego 2-1 mu mukino wa ½.
Ku wa 8 Kamane 2025, ni bwo habaye imikino ya ½ y’irushanwa ryo Kwibuka ryateguwe n’abahoze bakina umupira batuye mu Akarere ka Kamonyi ariko banafite ababo bishwe muri Jenoside yakorewe Abatutsi muri Mata 1994.
Ni irushanwa ryarimo amakipe umunani none hasigayemo abiri yageze ku mukino wa nyuma. FAPA y’abahoze bakinira Amavubi itozwa na Higiro Thomas, yatsinze Forever FC y’abafana ba Arsenal ibitego 2-1 ihita iyisezerera muri ½.
Ni ibitego iyi kipe yatsindiwe na Kagabo Ismi ndetse na Ngabo Albert mu gihe kimwe rukumbi cy’abakunzi b’ikipe y’Abarashi, cyatsinzwe na Lomami André ariko nticyari gihagije.
FAPA iyoborwa na Murangwa Eric Eugène wahoze ari umunyezamu wa Rayon Sports n’ikipe y’Igihugu, Amavubi, izahura na Olympic FC yasezereye Victory biciye kuri za penaliti 3-0 nyuma y’uko amakipe yombi yari yanganyije ibitego 2-2 mu minota 90 y’umukino.
Biteganyijwe ko umukino wa nyuma uzakinwa ku wa 22 Kamena 2025 ku kibuga cyo ku Ruyenzi giherereye mu Akarere ka Kamonyi. Ni irushanwa riri gukinwa ku nshuro ya ryo ya gatatu.
UMUSEKE.RW
