Perezida Yoweri Kaguta Museveni, umaze imyaka 39 ku butegetsi muri Uganda, yemejwe n’ishyaka rye NRM nk’umukandida mu matora ya 2026, aho azaba ahataniye manda ya munani.
Dr. Tanga Odoi, Umuyobozi wa Komisiyo y’Amatora ya NRM, yatangaje ko Perezida Museveni azafata impapuro zo kwiyamamaza ku wa Gatandatu, tariki ya 28 Kamena 2025.
Kuri uyu wa Kabiri, Dr. Tanga yabwiye abanyamakuru ko Museveni agomba gufata ifishi imwemerera guhagararira ishyaka NRM mu matora ya perezida.
Ati: “Nk’uko n’abandi bakandida babigenza, Perezida akaba n’Umuyobozi Mukuru wa NRM azaza gufata ifishi igaragaza ko aziyamamaza mu matora.”
Impapuro zo kwiyamamaza zizatangwa hagati ya tariki ya 26 Kamena n’iya 1 Nyakanga 2025, mu gihe urutonde ntakuka rw’abakandida bemejwe ruzatangazwa ku ya 4 Nyakanga.
Perezida Museveni, w’imyaka 80, amaze imyaka 39 ku butegetsi. Naramuka atsinze ayo matora, azatangira manda ye ya munani.
Yatangiye manda ya mbere mu 1986, iya kabiri mu 1996, iya gatatu mu 2001, iya kane mu 2006, iya gatanu mu 2011, iya gatandatu mu 2016, naho iya karindwi atangira mu 2021.
NDEKEZI JOHNSON / UMUSEKE.RW
