Impuzamashyirahamwe y’Umupira w’Amaguru muri Afurika [CAF], yazamuye inkunga y’amafaranga yageneraga amakipe yitabira amarushanwa ya yo.
Ubusanzwe amakipe yitabira amarushanwa ya CAF Champions League na CAF Confederation Cup, yagenerwaga ibihumbi 50$ buri imwe (asaga miliyoni 70 Frw).
Kuri iyi nshuro, buri kipe izajya ihabwa ibihumbi 100,000$ (arenga gato miliyoni 140 Frw). Ibi byose biri mu rwego rwo gufasha amakipe kurushaho guhatana.
Ikipe y’Igihugu y’Abagore izajya ibona itike yo gukina Igikombe cya Afurika, izajya igenerwa ibihumbi 120$ (asaga miliyoni 200 Frw).
Uku gukomeza kongera ibihembo n’ibyo amakipe agenerwa mbere yo kuyatangira, biri mu byo Dr. Patrice Motsepe uyobora CAF, ahora ashimirwa.
Biteganyijwe ko imikino ya CAF Champions League na CAF Confederation Cup 2025/2026, izatangira hagati muri Nzeri 2025.
UMUSEKE.RW
