Ubuyobozi bwa APR FC bwemeje ko bwahagaritse iminsi 30 abakinnyi, Dauda Yussif na Mamadou Sy nyuma y’imyitwarire mibi yabagaragayeho ubwo ikipe ya bo yari mu Misiri mu mukino wa CAF Champions League.
Mu cyumweru gishize ubwo ikipe y’Ingabo yari mu Misiri, hamenyekanye amakuru y’imyitwarire mibi yagaragaye ku bakinnyi babiri ba yo, Mamadou Sy na Dauda Yussif. Ibi byanatumye aba bombi badakinishwa ku mukino wo kwishyura wa CAF Champions League, Pyramids FC yatsinzemo ibitego 3-0.
Mu Itangazo ubuyobozi bwa APR FC bwashyize hanze, bwatangaje ko Sy na Yussif, barenze nkana ku mabwiriza y’umutoza n’ubuyobozi ubwo ikipe yari i Cairo mu Misiri.
Bakomeje bavuga ko ibi byagize ingaruka mbi ku musaruro wavuye muri uyu mukino. Ibi byatumye bafatirwa ibihano byo guhagarikwa iminsi 30 batari mu kazi.
Muri iri tangazo, ubuyobozi bw’ikipe y’Ingabo bwatangaje ko hagiye gukorwa iperereza kuri iyi myitwarire, nyuma ya ryo hakazamenyekana ikizakurikiraho.
UMUSEKE.RW
