Urwego rw’Igihugu Rushinzwe Igorora (RCS) rwatangaje ko imvano y’amasasu yumvikanye mu igororero rya Nyamasheke, byari ukurasa amasasu mu kirere mu rwego rwo guturisha itsinda rito ry’abagororwa bashatse kwigomeka.
Tariki ya 26 Ukwakira, 2025, ku igororero rya Nyamasheke humvikanye urusaku rw’amasasu.
Kuri uyu wa Mbere tariki ya 27 Ukwakira 2025, Urwego rw’Igihugu Rushinzwe Igorora (RCS) rwasobanuye imvano yayo masasu.
RCS yanditse kuri X iti “Taliki 26/10/2025, ku Igororero rya Nyamasheke harashwe amasasu mu kirere mu rwego rwo guturisha itsinda rito ry’abagororwa bashatse kwigomeka ku mategeko n’amabwiriza asanzwe agenga Igororero.”
Umuvugizi wa RCS, CSP Sengabo Hillary Emmanuel, yabwiye UMUSEKE ko abo bagororwa ari batandatu.
Ati “Kugeza ubu abagororwa bakurikiranyweho iyo myitwarire mibi bagera kuri batandatu.”
CSP Sengabo Hillary Emmanuel yavuze ko Igororero rya Nyamasheke rigororerwamo abagera kuri 885. Urwego rw’Igihugu Rushinzwe Igorora rwavuze ko muri iryo gororero ari amahoro nta muntu wagize ikibazo.
MUGIRANEZA Thierry / UMUSEKE.RW
