Ubuyobozi bw’Akarere ka Gatsibo buvuga ko barimo kurwana no kuzamura umubare w’Inka zigomba kujya muri Tekana, kuko izo bamaze gushyira mu bwishingizi ziri kuri 2%.
Mu butumwa Umuyobozi w’Akarere ka Gatsibo, Richard Gasana yahaye Ibitangazamakuru bitandukanye, avuga ko kuva gahunda ya Tekana urishingiwe Muhinzi Mworozi yatangira, Inka zirenga 1400 zimaze gushyirwa mu bwishingizi.
Gasana avuga ko uyu mubare w’izimaze gushyirwa muri Tekana, ukiri hasi ugereranyije n’uw’Inka 700000 aborozi bafite muri aka Karere.
Ati:”Turimo kureba uko tuzamura umubare w’Amatungo yose muri rusange duhereye ku Nka, kuko twasanze agomba kujya mu bwishingizi ari menshi”.
Avuga ko ubukangurambaga bwo gushishikariza aborozi kwitabira gahunda RAB yashyizeho yitwa Tekana urishingiwe muhinzi mworozi, bayifatanya no kwibutsa aborozi ko hari amabwiriza bagomba kwitaho, kuko abayirengagiza hari igihombo bashobora guhura nacyo.
Yakomeje ati:”Hari amasezerano aborozi bagirana n’Ibigo by’ubwishingizi bakwiriye kubanza gusoma, kuko ariyo Kampani z’Ubwishingizi ziheraho zishyura”.
Gasana avuga ko iyo muri raporo igaragaza uko Inka yarwaye n’icyayishe ikoze neza, Umworozi ashobora guhabwa amafaranga nyuma y’iminsi 7, byaba byatinze kubera impamvu, akayabona bitarenze ukwezi.
Cyakora yavuze ko iyo Inka cyangwa irindi tungo birwaye, icyihutirwa ari ugutanga amakuru bayamenyesha Kampani bagiranye amasezerano.
Rwihimba Célestin, Umworozi ntangarugero wo mu Murenge wa Gitoki, Akarere ka Gatsibo, avuga ko Inka z’umukamo zigorana ku bantu badakunze kuzitaho ku kigero cyiza.
Uyu mworozi avuga ko mu gace bororeramo haboneka uburondwe bwinshi kandi iyo bufashe Inka buzitera indwara nyinshi.
Ati:”Twapfushije Inka 3 mu minsi ishize, ariko ku bw’amahirwe bisanga zarashyizwe muri tekana, nishyurwa Miliyoni 3 n’igice y’u Rwanda “
Rwihimba avuga ko mu bushyo bwose bafite bamaze gushyira muri tekana Inka 25 zirimo imbyeyi, izihaka ndetse n’Inka nkuru Tekana yemera.
Yavuze ko ubwishingizi bukwiriye kujyana no kwita ku matungo, yongeyeho ko bamwe mu borozi bagifite umuco wo kwivurira amatungo yabo, kandi ko iki kibazo ariyo mbogamizi ituma batabona amafaranga y’ubwishingizi.
Usibye Umubare w’Inka uri ku kigero cyo hasi, Ingurube ziri muri tekana ni 79, mu gihe Inkoko ziri muri iyi gahunda zigeze kuri 400.
MUHIZI ELISÉE
UMUSEKE.RW/Gatsibo.
