Umugaba Mukuru w’Ingabo muri Gambia, Lieutenant General Mamat O.A yatangiye uruzinduko rw’akazi mu Rwanda rugamije kunoza imikoranire mu bya gisirikare hagati y’ibihugu byombi.
Ni uruzinduko rw’iminsi itandatu Lieutenant General Mamat O.A yatangiriye kuri Minisiteri y’Ingabo y’u Rwanda (MINADEF) kuri uyu wa 13 Ukwakira 2025, aho yakiriwe na Minisitiri w’Ingabo, Juvenal Marizamunda n’Umugaba Mukuru w’Ingabo z’u Rwanda, Gen Mubarakh Muganga, bagirana ibiganiro byihariye.
Uru ruzinduko ruva tariki 12 – 17 Ukwkaira, 2025 rugamije gukomeza ubufatanye bwa gisirikare hagati y’ingaboza Gambia n’iz’u Rwanda.
Mu byo Lieutenant General Cham yabwiwe mu biganiro yagiranye n’abayobozi bo hejuru muri RDF, ni uburyo umutekano mu karere wifashe, n’uruhare u Rwanda rugira mu bikorwa bigamije kugarura amahoro n’umutekano muri Africa.
Lieutenant General Mamat O.A yanasuye Urwibutso rwa Jenoside yakorewe Abatutsi rwo ku Gisozi mu rwego rwo guha icyubahiro abaharuhukiye.
Muri uru ruzinduko Umugaba Mukuru w’Ingabo muri Gambia yanasuye ibigo bitandukanye bya Minisiteri y’Ingabo n’iby’igisirikare cy’u Rwanda.
UMUSEKE.RW
