Impuzamashyirahamwe y’Umukino wo Gusiganwa ku Magare ku Isi, UCI, yatangaje imijyi 13 igomba kwakira amarushanwa akomeye ku Isi muri uyu mukino kugeza mu 2032.
Iki ni kimwe mu byemezo byemerejwe mu Nama y’Inteko Rusange ya 194 yabereye i Kigali, ku wa 25 Nzeri 2025, igahuza abanyamuryango ba UCI.
Menya imijyi izakira amarushanwa ya UCI ateganywa mu myaka irindwi iri imbere.
Isiganwa ry’Isi ryo mu misozi [UCI Mountain Bike Eliminator World Championships] riteganywa kuba mu 2026, rizabera mu Mujyi wa Barcelone muri Espagne.
Isiganwa ribera mu nzu ku rwego rw’Isi [UCI Indoor Cycling World Championships], riteganywa kuba mu 2026, rizabera mu Mujyi wa Derby mu Bwongereza.
Mu 2028, hateganyijwe isiganwa ry’Isi ry’Abafite Ubumuga [UCI Para-cycling Track World Championships]. Iri biteganyijwe ko rizabera mu Mujyi wa Rio de Janeiro muri Brésil.
Muri 2029, hateganyijwemo amasiganwa ane akomeye ku Isi. UCI Cyclo-cross World Championship izabera muri Province ya Treviso mu Butaliyani n’irindi ry’Abafite Ubumuga, UCI Para-cycling Road World Championships rizabera mu Mujyi wa Brasilia muri Brésil.
Hari kandi iryo Gusiganwa mu Misozi [Mountain Bike World Championships], biteganyijwe ko rizabera mu Mujyi wa Nové Město muri Repubulika ya Czech n’irya UCI Gran Fondo World Championships, biteganyijwe ko ryo rizabera mu Mujyi wa Mörbisch am See mu Autriche.
Mu 2030, hateganyijwe amasiganwa atatu na yo ari ku rwego rw’Isi. Hazaba irya Mountain Bike Marathon World Championships, rizabera mu Mujyi wa Selva Val Gardena mu Butaliyani, UCI Mountain Bike World Championships, rizabera mu Mujyi wa Durango muri Leta Zunze Ubumwe za Amerika na UCI Gran Fondo World Championships, biteganyijwe ko rizabera mu Mujyi wa Villars-sur-Ollon mu Busuwisi.
Umujyi wa Trentino mu Butaliyani, biteganyijwe ko uzakira shampiyona y’Isi y’Amagare mu 2031 mu gihe mu 2032, Umujyi wa Aalborg muri Denmark, wo uzakora isiganwa rya UCI Gran Fondo World Championships.
UMUSEKE.RW
