Ubuyobozi bwa APR FC, bwatangaje ko rutahizamu w’umunya-Burkina Faso, Djibril Quattara, akiri hanze y’ikibuga mu gihe kirenga ukwezi kubera uburwayi yagiriye mu mikino ya Cecafa Kagame Cup iherutse kubera muri Tanzania.
Ubwo ikipe y’Ingabo yari mu mikino ya Cecafa Kagame Cup iherutse kubera muri Tanzania, rutahizamu wa yo, Djibril Quattara yatahanywe adasoje irushanwa kubera uburwayi yari yagize.
Kuva ubwo kugeza magingo aya, uyu rutahizamu ntiyari yongera kugaragara mu kazi ka APR FC. Amakuru yavugaga uburwayi bwe, yavugaga ko yarwaye malariya n’ubwo hari andi makuru yavuzwe atandukanye na yo.
Aganira na B&B Kigali FM, Chairman w’ikipe y’Ingabo, Brig Gen, Déo Rusanganwa, yemeje ko Quattara azagaruka mu kibuga mu mezi abiri ari imbere. Ibi yabitangaje nyuma y’uko aganiriye n’abaganga b’iyi kipe.
Ikipe y’Ingabo itegerejweho gukora ibisa nko kurira umusozi, igatsinda Pyramids FC yo mu Misiri mu mukino ubanza w’ijonjora ry’ibanze mu mikino Nyafurika ya CAF Champions League. Ni umukino biteganyijwe ko utangira Saa Munani z’amanywa kuri Kigali Pelé Stadium.
UMUSEKE.RW
