Perezida Paul Kagame ari mu Bubiligi mu nama y’Abakuru b’Ibihugu yiga uko Isi yarushaho kwegerana, no gukemura ibibazo bitandukanye bishingiye ku bukungu, iyi nama yitabiriwe na Perezida Antoine Felix Tshisekedi na Perezida wa Africa y’Epfo Cyril Ramaphosa.
Ibiro by’Umukuru w’igihugu, Village Urugwiro bivuga ko Perezida Paul Kagame ari i Brussels, mu Bubiligi aho yitabiriye iyi nama iba kuri uyu wa Kane no ku wa Gatanu.
Muri iyi nama yitwa Global Gateway Forum 2025 igiye iba ku nshuro ya kabiri, Abakuru b’Ibihugu baraganira uko bateza imbere kurushaho kwegerana kw’abatuye isi (global connectivity) mu gihe hari ibibazo bishingiye kuri politiki n’imbogamizi zikomeye mu bukungu.
Iyi nama ihuza abayobozi bo ku rwego rwo hejuru bahagarariye ibihugu byabo, abakora mu nzego z’ibigo by’imari, abikorera, abahagariye imiryango yigenga bakaganira uko ibihugu byarushaho gufatanya mu iterambere.
Perezida Paul Kagame aragirana ibiganiro na Perezida wa Komisiyo y’Umuryango w’Ubumwe bw’Uburayi, Ursula von der Leyen, bigamije kureba ubufatanye busanzweho hagati y’u Rwanda n’uyu muryango.
Mu bakuru b’ibihugu bitabiriye iyi nama harimo Félix-Antoine Tshisekedi wa Repubulika ya Demokarasi ya Congo, wageze mu Bubiligi ku wa Gatatu nimugoroba.
Ni umwe mu badacana uwaka na Perezida Paul Kagame, aho buri umwe hagati yabo ashinja undi gushaka kumuhirika ku butegetsi. U Rwanda rushinja Congo Kinshasa gucumbikira no gukorana n’umutwe wa FDLR, naho Congo Kinshasa igashinja u Rwanda guha ubufasha bwa gisirikare umutwe wa AFC/M23.
Perezida Paul Kagame kandi ari mu Bubiligi mu gihe u Rwanda rwacanye umubano n’icyo gihugu rugishinja gufata uruhande mu bibazo biri mu burasirazuba bwa Congo.
Nta we uzi niba ibyo bibazo byose biganirwaho, cyakora ku bireba u Rwanda na Congo, Perezida Paul Kagame yagiranye ibiganiro na Massad Boulos, Umujyanama Udasanzwe wa Perezida wa Leta Zunze Ubumwe za Amerika, Donald Trump kuri Africa, uyu Boulos uri mu Bubiligi yanagiranye ibiganiro na Visi Minisitiri w’Intebe w’icyo gihugu akaba na Minisitiri w’Ububanyi n’Amahanga, Maxime PREVOT.
Maxime PREVOT yavuze ko mu yaganiriye na Massad Boulos harimo guteza imbere amahoro muri Africa, by’umwihariko ku makimbirane ari muri Sudan no mu Burasirazuba bwa Congo Kinshasa.
Yavuze ko ashima uruhare rwa America, Qatar na Africa yunze Ubumwe mu gushaka igisubizo cy’amahoro muri Congo, ndetse avuga ko Ububiligi buzashyigikira iyo ntambwe.
Ati “Twemeranyije ko ari ngombwa kuri buri ruhande gukurikiza ibyo rwemeye, kandi hagakomeza gushyirwa imbere inzira y’ibiganiro.”
Ku kibuga biberaho siko bimeze, Perezida Felix Tshisekedi aherutse kuvuga ko azisubiza ibice byose AFC/M23 yafashe. Ni nako buri ruhande rwisuganya aho ingabo za Leta ya Congo zakajije umurego mu bitero by’indege sa Sukhoi na drones zirasa ahagenzurwa na AFC/M23, mu gihe AFC/M23 na yo yongereye ubwirinzi no gusanga izo ntwaro aho ziri haba muri Kivu ya Ruguru na Kivu y’Amajyepfo.
UMUSEKE.RW
