Abinjiza agatubutse babicyesha imbuga nkoranyambaga, abahanga mu guhanga udushya kuri izo mbuga n’ibyamamare, bagiye guhurira mu musangiro wo kumenyana, kungurana ibitekerezo no kurebera hamwe uko internet ibyazwa amafaranga.
Iki gikorwa, kigiye kuba ku nshuro ya mbere, cyateguwe n’itsinda ryibumbiye muri Smart250, giteganyijwe ku wa 15 Ugushyingo 2025 kuri Maison des Jeunes Kimisagara mu Mujyi wa Kigali.
Iri tsinda ryateguye iki gikorwa rivuga ko cyatekerejweho kugira ngo habeho kungurana ibitekerezo no kwiteza imbere.
Ubuyobozi bwaryo bwabwiye UMUSEKE ko uyu musangiro ufunguye ku bantu bose bafite ubushake bwo kwiga no kwagura ubumenyi mu gukoresha imbuga nkoranyambaga.
Bwagize buti: “Twabiteguye tugamije guhura, tukaganira, tukamenyana, tukungurana ubumenyi no kuzamura urwego rw’imikorere. Twifuza kubona umuryango waba ‘Content Creators’ nk’uko bibaho ahandi.”
Bwagaragaje ko muri iyi ‘Meet and Greet’, abafite inararibonye mu ruganda rw’ubuhanzi n’ubushabitsi bazasangiza bagenzi babo amasomo yo guteza imbere impano no kwagura ubumenyi mu mwuga bakora.
Abo barimo Jackson Dushimimana, Abayo Yvette Sandrine bazwi kuri YouTube, Fally Merci utegura ibitaramo bya ‘Gen-Z Comedy’ na Ally Soudy, umunyamakuru w’imyidagaduro n’umuyobozi w’ibitaramo.
Barimo kandi Alpha Sam, Biggy Shalom, umuhanzi akaba n’umuhanga mu bijyanye na ‘content creation’, Aime Musabwe usanzwe atanga ibiganiro ku mikorere ya YouTube haba muri Nigeria n’ahandi, ndetse n’abandi benshi.
Byitezwe ko bamwe mu bayobozi b’ibitangazamakuru n’abahagarariye urwego rwa RIB bazatanga ibiganiro ku buryo bwiza bwo gutambutsa ibitekerezo, butagize icyaha kandi bwinjiza amafaranga.
Ubuyobozi bwa Smart250 Academy buvuga ko bifuza ko iki gikorwa cyajya kiba kenshi, kuko bafite ishuri ryo kuri internet, kandi mu gihe cya vuba bazarishinga i Kigali.
Buti: “Muri Smart250 Academy duhuzwa n’ubumenyi mu bya tekinoloji, aho twiga ibintu bitandukanye nka AI, programming, gukora content no gusobanukirwa uko imbuga za internet zikora ndetse no kuzibyaza umusaruro.”
Kwitabira uyu musangiro bizasaba ibihumbi 10 Frw ku banyamuryango ba Smart250, ndetse n’ibihumbi 20 Frw ku bandi bose bifuza kunguka ubumenyi, gusangira no gusabana.
Smart250 Academy ivuga ko hashyizweho uburyo bw’iyakure (‘online’) buzafasha abatazabasha kugera aho iki gikorwa nyirizina kizabera.
NDEKEZI JOHNSON /UMUSEKE.RW
