Mu rwego rwo gukomeza kwitegura neza imikino Nyafurika y’Abakozi, ikipe y’umupira w’amaguru y’Ikigo cy’Igihugu cy’Ubuzima (RBC), yatsinze abanya-Bénin ibitego 3-0 mu mukino wa gicuti.
Kuri uyu wa Gatandatu, tariki ya 4 Nzeri 2025, ni bwo RBC yatsinze ibitego 3-0 abakozi ba Minisiteri y’Imari n’Igenamigambi muri Bénin mu mukino wa gicuti wari ugamije gukomeza gushimangira umubano mwiza w’Ibihugu byombi.
Uyu mukino wabereye kuri Kigali Pelé Stadium, witabiriwe n’abayobozi batandukanye barimo Umuyobozi Mukuru wa Minisiteri y’Imari n’Igenamigambi muri Bénin (AS-MEF), Mpamo Thierry Tigos wayoboye Ishyirahamwe ry’Imikino y’Abakozi mu Rwanda (ARPST) n’abandi.
Undi Muyobozi wagaragaye muri uyu mukino, ni Cyubahiro Beatus usanzwe ashinzwe Siporo mu Ikigo cy’Igihugu cy’Ubuzima ndetse yari muri 11 babanjemo ku ruhande rwa RBC FC.
RBC FC yatsindiwe na Byamungu Abbas, Mwizerwa Emmanuel na Nshimiyimana Patrick.
Uyu mukino wa gicuti mpuzamahanga, wafashije RBC FC gukomeza kwitegura neza imikino Nyafurika y’Abakozi izabera muri Algérie mu Ugushyingo 2025.
UMUSEKE.RW
