Urwego rw’Igihugu rw’Ubugenzacyaha (RIB) rwatangaje ko rwafunze abakozi babiri bakora mu Kigo cy’Igihugu gishinzwe Ubuzima (RBC) na rwiyemezamirimo akaba na nyirikigo cy’ubucuruzi cyitwa Paramount Company, bakurikiranweho ubufatanyacyaha ku cyaha cyo gusaba, kwakira no gutanga indonke no gukoresha inyandiko itavugisha ukuri.
Umuvugizi wa RIB, Dr.Murangira B Thierry yavuze ko abafashwe ari Uwawe Olivier ushinzwe ikoranabuhanga muri Minisiteri y’Ubuzima, na Bicamumpaka Jean Pierre ushinzwe imari muri RBC na rwiyemezamirimo Mugisha Emmanuel.
Aba bakozi bakaba bahuriye muri komite ishinzwe kwemeza no kwakira ibyaguzwe (Receiving Committee) muri RBC.
Umuvugizi wa RIB yavuze ko iperereza ry’ibanze ryakozwe ryagaragaje ko abakekwa bafatanyije na rwiyemezamirimo wari ufite isoko ryo gutanga ibikoresho by’ikoranabuhanga, bahimbye imibare iranga (Serial numbers) mudasobwa 71 n’imashini 25 bikorana zizwi nka CPUs bayongera ku cyemezo kigaragaza ibyakiriwe (delivery note).
Yongeyeho ko ikindi iperereza ryagaragaje ari uko aba bakozi bemeje ko ibikoresho basabye rwiyemezamirimo yabitanze byose kandi atari ukuri, hanyuma Bicamumpaka, ushinzwe imari muri RBC yishyura amafaranga yabyo abizi, bituma habaho inyerezwa ry’ibifite agaciro ka miliyoni 48,4Frw.
Umuvugizi wa RIB yemeje ko hari ibimenyetso by’uburyo rwiyemezamirimo Mugisha Emmanuel yagiye yohereza ruswa y’amafaranga aba bagize komite ishinzwe kwemeza, no kwakira ibyaguzwe muri RBC kugira ngo bamusinyire kandi bituzuye.
Yanaburiye abakoresha ububasha bahabwa n’amategeko mu nyungu zabo bwite kubireka kuko RIB itazahwema kubakurikirana kugirango bahanwe.
RIB igaragaza ko abafashwe atari ubwa mbere bakurikiranweho ibyaha bya ruswa, kuko muri Nzeri uyu mwaka bakurikiranweho icyaha cyo gutanga inyungu zidafite ishingiro mu gihe cy’ishyirwa mu bikorwa ry’amasezerano y’isoko.
Ubu bafungiye kuri Sitasiyo za RIB za Remera na Kicukiro, mu gihe dosiye yabo iri gutunganywa kugira ngo ishyikirizwe Ubushinjacyaha.
Ivomo: RIB Website
UMUSEKE.RW
