Ibiro by’Umuryango w’Abibumbye bishinzwe uburenganzira bwa muntu bivuga ko muri Tanzania, abantu 10 baguye mu myigaragambyo imaze iminsi itatu yo kwamagana amatora ya Perezida.
Ibyo biro bivuga ko bihangayikishijwe n’imfu z’abo bantu n’umubare munini w’abakomeretse.
Abakoze raporo bavuga ko babonye amakuru yizewe yemeza ko abantu 10 bishwe mu mujyi wa Dar es Salaam, Shinyanga na Morogoro ubwo abashinzwe umutekano barasaga imyuka iryana mu maso mu rwego rwo gutatanya abigaragambya.
Ishyaka rya CHADEMA ryo rivuga ko abapfuye babarirwa muri 700 nk’uko ryabibwiye AFP, ndetse na yo ikavuga ko uwo mubare wemejwe n’umwe mu bakora mu nzego z’umutekano.
Imyigaragambyo yakomeje kuba mu gihugu nubwo igisirikare cya Tanzania cyabujije abarimo kuyikora kivuga ko “ibikorwa byabo bitemewe n’amategeko.”
Abigaragambya baravuga ko badashaka Mama Samia (Perezida wa Tanzania Samia Suluhu Hassan), na CCM ari ryo shyaka riri ku butegetsi.
Bamushinja kurigisa abantu, gufunga abatavuga rumwe na Leta n’ibindi.
Muri Tanzania ubutegetsi bwakuyeho Internet nyuma y’amatora yabaye tariki 29 Ukwakira, 2025.
Ibiro bishinzwe uburenganzira bwa muntu muri UN, birasaba inzego z’umutekano muri Tanzania guhagarika gukoresha ingufu z’umurengera ku bantu bigaragambya, no kugerageza kugarura umutuzo.
Uru rwego ruranasaba abigaragambya kubikora mu mahoro.
Abigaragambya batwitse ibiro bya Polisi, ahakorewe amatora, n’inzu z’ubucuruzi bazi ko ari Iz’abanyepolitiki bari mu butegetsi cyangwa abo bafitanye isano.
Kugeza ubu ibyavuye mu matora ntibiratangazwa ariko amahirwe menshi afite Perezida Samia Suluhu Hassan usanzwe ku butegetsi.
Tanzania ntacyo iravuga ku mibare y’abantu baba baguye mu myigaragambyo.
UMUSEKE.RW
Azayobora abahe ko batamusha kandiko abamurwanya aribo yakayoboye