Leta ya Tanzania yamaganye icyegeranyo cy’Umuryango uharanira Uburenganzira bwa Muntu (HRW) iyishinja guhutaza no gukora ibikorwa by’iyicarubozo mbere y’amatora ya Perezida yo mu Ukwakira 2025.
Mu itangazo ryashyizweho umukono n’Umuvugizi wa Leta ya Tanzania, rivuga ko iki cyegeranyo cyuzuyemo ibihuha kandi Tanzaniya itahawe umwanya wo kwiregura.
Gerson Msigwa, uvugira Leta, yavuze ko bibabaje kubona ishyirahamwe rizwi ku rwego mpuzamahanga ritangaza ibirego bidafite ishingiro, bigamije gusiga icyasha isura y’igihugu mu mahanga.
Yavuze ko ibyo HRW ivuga ko abategetsi benshi ba Tanzania bahawe umwanya wo kwiregura kuri ibi birego ari ikinyoma cyambaye ubusa.
Yagize ati: “Kuko nta butumwa bwigeze butangwa mu buryo bw’ibaruwa, telefoni cyangwa email.”
Yongeyeho ko : “Leta ya Tanzania yifuje gushimangira ko imiryango ifunguye kandi yiteguye guha umwanya amashyirahamwe ashaka amakuru y’ukuri ku bijyanye n’uburenganzira bwa muntu n’uko ibintu bimeze mu gihugu.”
HRW yatangaje ko ubutegetsi bwa Tanzania bwashyize imbaraga mu kujujubya no kubangamira abanyapolitiki, bikaba biteye impungenge ko amatora ateganyijwe ku wa 29 Ukwakira ashobora kutagenda neza.
HRW ivuga ko Tanzania iburagiza abatavuga rumwe n’ubutegetsi n’abanenga ishyaka riri ku butegetsi, igafunga umunwa ibinyamakuru ndetse ikanima ubwigenge abashinzwe gutegura no guhagararira amatora.
Nomathamsanqa Masiko-Mpaka, umushakashatsi wa Human Rights Watch muri Afurika, yagize ati: “Abategetsi ba Tanzania bakwiye guhita bafata ingamba zo kurengera ubuziranenge bw’aya matora yo mu Ukwakira, kuko ubu ari mu kaga gakomeye.”
Yavuze ko abategetsi ba Tanzania bakwiye guhagarika gufunga ubwisanzure bw’itangazamakuru, ahubwo bagakora impinduka nyazo zatuma amatora aba meza kandi muri demokarasi.
Gerson Msigwa yavuze ko abantu bakwiye kumenya ko uburenganzira bwo kubaho, ubwisanzure n’umutekano butangwa n’itegeko nshinga ry’igihugu.
Yagize ati: “Leta ya Tanzania yiyemeje kurinda uburenganzira bwa muntu imbere y’amatora rusange yo mu 2025 no nyuma yayo, nk’uko ihora ibikora.”
NDEKEZI JOHNSON / UMUSEKE.RW
