Biciye muri gahunda yatangijwe na Perezida w’u Bushinwa, Xi Jinping, igamije guteza imbere imikoranire y’iki gihugu n’Ibihugu byo ku Mugabane wa Afurika mu Iterambere, iki gihugu kirakataje mu bikorwa by’Iterambere ry’uyu Mugabane n’indi Migabane ikiri mu nzira y’Amajyambere.
Binyuze mu kiganiro n’abanyamakuru cyabaye ku wa Mbere, tariki ya 27 Ukwakira 2025, ikigo cya Startimes Rwanda gisakaza amashusho, cyamuritse umushinga w’u Bushinwa, ugamije gusangiza ibihugu bikiri mu nzira y’amajyambere, ubumenyi ku buryo iki gihugu cyo mu Burasirazuba bwa Aziya cyateye imbere. Uyu mushinga witwa ‘The Glimpse of China in New Era.’
Ni umushinga mugari ushyirwa mu bikorwa binyuze mu kiganiro cya “The Glimpse of China in New Era,” kinyuzwa ku mashene ya StarTimes arimo ST Zone na ST Novela E.
Ni ikiganiro cyari kigamije ahanini gusangiza abaturage bo mu bihugu byo ku Mugabane wa Afurika bikiri mu nzira y’amajyambere, uburyo u Bushinwa bwateye imbere mu nzego zitandukanye zirimo Ubuhinzi, Uburezi, Ikoranabuhanga, n’izindi nzego z’Ubukungu n’Imibereho Myiza.
Ku nshuro ya mbere, uyu mushinga watangijwe mu mwaka wa 2018 na Perezida w’u Bushinwa, Xi Jinping, ndetse ni ubwa mbere umuritswe ku mugaragaro mu gihugu cy’u Rwanda.
U Bushinwa nyuma y’umwaka wa 1949, ni bwo u Bushinwa bwatangiye urugendo rwo gutera imbere ariko impinduka nyazo zigaragara mu bukungu zatangiye kugaragara cyane kuva mu 1978, ubwo hatangizwaga politiki nshya yiswe “ivugurura no gufungura imiryango y’ubukungu”, (Reform and Opening Up).
Umuyobozi Ushinzwe kumenyekanisha ibikorwa muri Startimes, Lizzie LYU, avuga ko binyuze muri uyu mushinga, haziyongera umubare w’Abashinwa n’ibikoresho bazana mu Rwanda, hagamijwe gukomeza gufasha Abanyarwanda kwiteza imbere.
Ati” U Bushinwa n’u Rwanda bisanzwe bifitanye umubano mwiza, ni yo mpamvu twifuje gusangira ubumenyi n’u Rwanda kandi twizerako binyuze muri uyu mushinga hazaza Abashinwa benshi ndetse n’ibikoresho bizafasha mu kuzamura igihugu ku rwego rw’u Bushinwa.”
Umuyobozi ushinzwe Itangazamakuru muri Startimes Rwanda, Rène Paluku, yavuze ko u Bushinwa ari igihugu cyateye imbere mu nzego zose, ku buryo nk’abaturage batuye mu bice bitandukanye by’Igihugu cy’u Rwanda bashobora kubwigiraho nko gukora ubuhinzi bugezweho.
Ati” U Bushinwa ni kimwe mu bihugu byateye imbere mu bijyanye n’ubuhinzi, u Rwanda rero numva ari igihugu cyiza cyo kuba twakijyiraho ibijyanye n’ubuhinzi ndetse no mu bindi bice by’umwihariko nk’ubucuruzi muri rusanjye.”
Umuyobozi ushinzwe ibiganiro bya Startimes, Irakoze Benitha, avuga ko mu rwego rwo kugira ngo ibi biganiro bikurikirwe na benshi ndetse bumva ibivugwa, u Bushinwa bwatangije gahunda yo kwigisha ururimi rw’Igishinwa hirya no hino mu bihugu bya Afurika n’u Rwanda.
Avuga ko biteze ko mu bihe biri imbere, ibi biganiro bizashyirwa mu zindi ndimi zishobora kumvwa n’Abanyarwanda benshi, ndetse bigacishwa no ku mashene avuga Ikinyarwanda kuri StarTimes, nka ‘Ganza’.
Abanyarwanda bashishikarijwe gukurikirana iki kiganiro kizabafasha kunguka ubumenyi no kwigira kwiterambere ry’u Bushinwa, icyo basabwa ni ukuba bafite Decoderi ya Star Times ndetse bishyura ifatabuguzi rya buri kwezi.
UMUSEKE.RW
