Umuyobozi w’ishuri wungirije ushinzwe amasomo (Prefet des étude) muri G.S Mututu riri mu murenge wa Kibirizi mu karere ka Nyanza yahawe igihano cy’ukwezi adakora, ndetse adahembwa bikekwa ko yazize gusindira mu kazi nk’uko umuyobozi w’ishuri rya G.S Mututu yabimushinjaga.
Mu kwezi kwa Gicurasi 2025 UMUSEKE twabagejejeho inkuru yari ifite umutwe ugira uti “Rurageretse hagati y’umuyobozi w’ishuri n’umwungirije bapfa ubusinzi.”
Umuyobozi w’ishuri rya G.S Mututu yashinje mugenzi we ushinzwe amasomo (Prefet des études) kuza mu kazi yasinze mu bihe bitandukanye, uvugwa we yavugaga ko amubeshyera kandi agamije kumwirukanisha.
Ririya shuri riherereye mu kagari ka Mututu mu murenge wa Kibirizi mu karere ka Nyanza.
Umuyobozi w’ishuri rya G.S Mututu aherutse kubwira UMUSEKE ko umuyobozi umwungirije yazaga mu kazi yasinze, ndetse anamwandikira ibaruwa amusaba ibisobanuro arabyemera anasaba imbabazi.
Mu kiganiro UMUSEKE twagiranye n’umuyobozi wungirije ushinzwe amasomo (Prefet des études) yabyamaganiye kure, avuga ko umuyobozi w’ishuri amubeshyera agamije kumwirukanisha.
Icyo gihe Patrick Kajyambere uyobora akarere ka Nyanza yatubwiye ko iki kibazo atakizi, ariko agiye kugikurikirana.
Amakuru yizewe agera ku UMUSEKE ubuyobozi bw’akarere ka Nyanza bwandikiye uriya muyobozi w’ishuri wungirije ushinzwe amasomo, bumuhanisha igihano cy’ukwezi adakora ndetse atanahembwa.
Twifuje kubaza umuyobozi w’akarere ka Nyanza Patrick Kajyambere ariko ntibyadushobokeye.
Rurageretse hagati y’umuyobozi w’ishuri n’umwungirije bapfa ubusinzi
Théogène NSHIMIYIMANA
UMUSEKE.RW i Nyanza
