Impuzamashyirahamwe y’Umupira w’Amaguru muri Afurika, CAF, yahaye amahirwe abasifuzi batatu mpuzamahanga b’Abanyarwanda yo kuzaba bari mu bazasifura imikino ya CECAFA y’ingimbi z’abatarengeje imyaka 17 izabera muri Éthiopie.
Aba basifuzi barimo Nsabimana Céléstin usifura hagati mu kibuga, Murangwa Usenga Sandrine na Habumugisha Emmanuel bombi basifura ku ruhande. Aba bose bari mu bazaba basifura iri rushanwa ry’ingimbi.
U Rwanda ruzahagararirwa n’ikipe igizwe n’abakinnyi 24 banafashe indege berekeza muri Éthiopie. Aba bazatozwa na Habimana Sosthène n’abungiriza barimo Kirasa Alain na Muyenzi Dieudonné.
Biteganyijwe ko iri rushanwa, rizakinwa guhera tariki ya 15 Ugushyingo kugeza tariki ya 2 Ukuboza 2025. Amakipe atatu ya mbere, azahita akatisha itike y’Igikombe cya Afurika 2026 cy’abatarengeje imyaka 17.
UMUSEKE.RW
