Urwego rushinzwe Abinjira n’Abasohoka muri Liberia rwatangaje ko Abanyarwanda bemerewe kwinjira muri icyo Gihugu batabanje gusabwa Visa.
Ni ibikubiye mu Itangazo uru rwego rwasohohoye ku wa Gatanu, tariki ya 14 Ugushyingo 2025, rivuga ko bimenyeshejwe abakozi barwo bose aho bakorera.
Uyu mwanzuro wakurikiye amasezerano yasinyweho n’ibihugu byombi ku wa 10 Nzeri 2025, ayo yarimo ayo gushyiraho komisiyo ihuriweho iziga ku bijyanye n’imikoranire ndetse n’ayo gukuraho visa hagati y’ibihugu byombi.
Aya masezerano yashyiriweho umukono i Monrovia muri Liberia na Minisitiri w’Ububanyi n’Amahanga, Ambasaderi Olivier Nduhungirehe na mugenzi we wo muri iki gihugu, Sara Beysolow Nyanti.
Liberia ni igihugu giherereye mu burengerazuba bwa Afurika ku nkombe z’Inyanja ya Atlantic, kikaba gihana imbibi na Sierra Leone, Guinea na Côte d’Ivoire.
Yashinzwe mu 1847, ikaba ari yo Repubulika ya mbere yashinzwe muri Afurika, ishingwa ahanini n’abari baturutse muri Amerika ariko bakomokaga ku Banyafurika bari barajyanwe mu mirimo y’uburetwa n’ubucakara.
Banki y’Isi ivuga ko Liberia ari Igihugu gifite abaturage barenga miliyoni eshanu. Umurwa mukuru ni Monrovia
Ubukungu bwa Liberia bushingiye ku mutungo kamere urimo zahabu n’ubuhinzi burimo ubukomeye bw’igihingwa cya Kawucho.
Umubano w’u Rwanda na Liberia, si uwa none dore ko no muri Nzeri 2024, i Kigali ibihugu byombi byari byasinyanye amasezerano yagutse y’ubufatanye ko kwagura umubano.
Ibihugu byombi kandi bikorana mu nzego zirimo gusangira ubumenyi mu by’umutekano binyuze muri Polisi ndetse no mu burezi aho Abanya_Liberia baza kwiga mu Rwanda ibijyanye n’amategeko.
Rosemary Mbabazi ni we uhagarariye u Rwanda muri Liberia nka Ambasaderi ariko afite ucyicaro i Accra muri Ghana.
MUGIRANEZA THIERRY/ UMUSEKE.RW
