Ishyirahamwe Nyarwanda ry’Abanyamakuru, ARJ, rifatanyije n’Urwego rw’Abanyamakuru Bigenzura (RMC), Urwego rw’Igihugu rw’Imiyoborere mu Rwanda (RGB) n’abandi bafatanyabikorwa, ryahembye abanyamakuru batangaje inkuru zabaye nziza mu zagiye mu ipiganwa zigahiga izindi mu mwaka wa 2025.
Ni ibihembo byatanzwe ku wa Gatanu, tariki ya 7 Ugushyingo 2025, mu muhango wahuriranye no kwizihiza Umunsi Nyafurika w’Itangazamakuru.
Muri uyu mwaka, hatanzwe ibihembo 32 mu byiciro bitandukanye mu gutara no gutangaza amakuru, hitabiriye abarenga 178 barimo abagore 65 n’ab’igitsina gabo 115.
Inkuru zatanzwe mu marushanwa, iza televiziyo ni 46, iza radio 61 mu gihe izanyujijwe kuri murandasi ari 71.
ARJ yasobanuye ko ibi bihembo bigamije gushimira abanyamakuru, ndetse no kwimakaza umuco wo gukora kinyamwunga nk’uko amahame y’itangazamakuru abiteganya.
Ibihembo bitandukanye byatanzwe ku banyamakuru babaye indashyikirwa:
Umunyamakuru w’umwaka yabaye Niyifasha Didas wo kuri Radio Inkoramutima, naho igihembo cy’umuntu wakoze ibikorwa by’indashyikirwa mu itangazamakuru cyahawe Nyakwigendera Ingabire Marie Immaculée wari umuyobozi wa Transparency International Rwanda, ahanini bishingiye ku ruhare rwe mu guteza imbere itangazamakuru ryubaka nyuma ya Jenoside yakorewe Abatutsi mu 1994.
Perezida w’Ishyirahamwe ry’Abanyamakuru mu Rwanda, ARJ, Dan Nkurunziza, yavuze ko iri shyirahamwe rizashyira miliyoni 2 Frw mu muryango wari washinzwe na Ingabire.
Mu cyiciro cy’inkuru ndende (Feature Story) zasohotse ku bitangazamakuru byandika kuri murandasi, igihembo cyegukanywe na Munyantore Jean Claude wa Kigali Today.
Mu nkuru z’ubuzima, Emilienne Kayitesi wa Isango Star ni we wahawe igihembo, naho mu nkuru ziteza imbere ikoranabuhanga n’itumanaho, igihembo cyahawe Nizeyimana Abdul Kudus ukorera Energy Radio mu Karere ka Musanze.
Mu nkuru zivuga ku burere n’imikurire y’umwana, abegukanye ibihembo ni Samuel Kwizera ukora kuri Radio Umucyo, Nikuze Nkusi Diane wa Umuringa News, na Ubonabagenda Yusuf wo kuri TV10.
Mu cyiciro cy’inkuru za siporo, Rigoga Ruth wo muri RBA ni we wegukanye igihembo, naho mu nkuru zivuga ku buhinzi, igihembo cyahawe Nkurunziza Michel ukorera The New Times.
Inkuru icukumbuye yatsindiye igihembo yakozwe na Bizimana Desire wa Radio Ishingiro, naho mu nkuru ziteza imbere uburenganzira bw’abafite ubumuga, igihembo cyahawe Ndayisaba Jean de Dieu ukora kuri Radio/TV10.
Mu cyiciro cy’inkuru ndende mu majwi (Best Documentary), igihembo cyahawe Nshimiyumukiza Bernard wo kuri Radio Salus, naho mu nkuru zibanda ku bisobanuro mu mibare (Data Journalism Awards), Twahirwa Eric wo kuri Deepnew.org ni we wabaye uwa mbere.
Inkuru ziteza imbere akamaro k’amazi, isuku n’isukura no kurwanya indwara zituruka ku mwanda zatsindiwe na Athanase Munyarugendo wa Radio Salus na Mukandayisenga Phoibe wo kuri Radio Ishingiro.
Mu rwego rw’inkuru z’ubuvugizi ku kurwanya inda ziterwa abangavu ndetse n’inkuru ziteza imbere uburinganire n’ubwuzuzanye, igihembo cyahawe Habumugisha Innocent wo kuri Radio Salus.
Mu nkuru z’ubuvugizi ku ihohoterwa rishingiye ku gitsina n’irikorerwa abana, Turatsinze Jean Paul wo muri RBA ni we watsinze, naho inkuru yatsinze mu buringanire n’ubwuzuzanye bw’abagabo n’abagore yakozwe na Nkurikiyimana Jean Claude wo kuri Radio Salus.
Mu cyiciro cy’ikiganiro cy’umwaka (Talkshow of the Year), Nkundamahoro Alphonse wo kuri Radio Ishingiro ni we wegukanye igihembo. Inkuru ivuga ku miyoborere myiza n’imitangire ya serivisi inoze yakozwe na Bizimana Emmanuel wo kuri Isango Star, naho mu nkuru zivuga ku bucuruzi, igihembo cyahawe Ntirenganya Emmanuel wo muri The New Times.
Mu bijyanye n’inkuru zivuga kuri gahunda ya Gira Wigire, Uwimana Abraham ukorera IGIHE ni we watsinze, mu gihe mu nkuru zigaragaza uburyo ubuyobozi bwegerezwa abaturage, igihembo cyahawe Mbonimpa Nepomuscene wa kuri Radio Salus.
Mu cyiciro cy’inkuru zivuga ku itangwa rya serivisi hakoreshejwe ikoranabuhanga, Manzi Sabin wa IGIHE ni we wahawe igihembo, naho mu nkuru zigaragaza akamaro k’umuganda mu kubaka ubumwe n’ubufatanye, igihembo cyahawe Ntagara Delphine wo kuri Radio Salus.
Inkuru nziza yakozwe n’umugore yegukanywe na Phoibe Mukandayisenga wo kuri Radio Ishingiro, wanegukanye n’igihembo cy’inkuru y’umwaka.
Mu cyiciro cy’inkuru ku misoro, igihembo cyahawe Pascal Nzabahimana wo kuri Radio Salus, naho mu nkuru z’ubukungu n’ubucuruzi, Niyomukiza Gilbert wo kuri Radio Ishingiro ni we watsinze. Hari kandi ibihembo byihariye byatanzwe n’umuryango wa ARFEM byahawe Karungi Dorine, Uwera Ancille, na Nayituriki Marie Josiane nk’ishimwe ryihariye ku ruhare rwabo mu guteza imbere itangazamakuru ry’u Rwanda mu bagore.
MUGIRANEZA THIERRY/ UMUSEKE.RW
