Ibigo 24 byahize ibindi mu gutanga serivisi nziza byahembwe

Ku nshuro ya cumi, ibihembo ngarukamwaka bizwi nka Service Excellence Awards bihabwa ibigo bya Leta n’ibyigenga by’indashyikirwa mu kwakirana ubwuzu ababigana no gutanga serivisi inoze byatanzwe.

Ibi bihembo bitegurwa n’Ikigo Kalisimbi Events ku bufatanye n’abafatanyabikorwa bacyo, byatanzwe mu ijoro ryo ku wa 31 Ukwakira 2025.

Umuyobozi wa Kalisimbi Events, Mugisha Emmanuel, yavuze ko buri mwaka bakora ubushakashatsi bugamije kumenya abatanga serivisi nziza, bakabashimira, kandi bikaba n’umuyoboro mwiza wo kungurana ibitekerezo.

Yagize ati: “Intumbero yacu ni ukwaguka tukarenga imbibi z’u Rwanda, tukagera no mu Karere, tugatumira abashoramari bagize uruhare mu iterambere rya Afurika.”

Abahawe ibi bihembo bahurije ku kuba bibongerera imbaraga mu kumenyekanisha ibyo bakora no kurushaho gutanga serivisi inoze ku babagana, kuko umukiriya ari umwami.

David Mitali, umukozi wa Rwanda Stock Exchange, yavuze ko mu rwego rwo gukomeza gutanga serivisi inoze, bakomeje gufasha abantu n’ibigo gusobanukirwa neza iby’imari n’imigabane.

Yagize ati: “Dutanga ubujyanama bwihariye ku masosiyete mato n’aciriritse, kugira ngo babone inguzanyo idahenze binyuze ku isoko, aho kwirirwa batonze imirongo mu mabanki.”