Ifatwa ry’agace ka Kilungutwe n’amahirwe biha AFC/M23

Ingabo za ARC/M23 zigaruriye agace kitwa Kilungutwe muri Kivu y’epfo, amakuru aravuga ko inyeshyamba ziri hafi ya Teritwari ya  Mwenga.

Ingabo za M23 zafashe Kilungutwe zivuye muri Walungu, bamwe mu bahatuye bavuga ko aha Kilungutwe ari mu rugabano ruhuza Zone ya Walungu na Mwenga.

Gusa hari amakuru avuga ko mu ijoro ryakeye AFC/M23 yaba yinjiye mu Mujyi wa Mwenga, gusa umwe mu bariyo avuga ko yabonye ingabo za leta ya Congo, FARDC n’abo bafatanya bayabangiye ingata.

Mu birindiro byabo ngo bahasize ibikoresho byinshi bya gisirikare birimo imbunda zikomeye zirasa kure.

Ruhanduka Sadock bakunze kwita Mwami wakoreye muri ibi bice, yabwiye UMUSEKE ko gufata Teritwari ya Mwenga ari amahirwe ku Ngabo za M23 kubera ko ari amahuriro y’umuhanda uva Kamituga n’undi ujya muri Zone ya Itombwe.

Ati: ”Mwenga uba werekeza i Kamituga, Umujyi ukungahaye ku mabuye y’agaciro ari na yo izo ngabo za FARDC, FDRL na Wazalendo birirwamo.”

Ruhanduka avuga ko iyo uvuye muri uyu Mujyi wa Mwenga werekeza i Tombwe ukoresha urugendo rw’iminsi itatu ku maguru ukaba ugeze ahitwa mu Mikenke, ukaba usigaje amasaha makeya kugira ngo ugere mu Minembwe.

Akavuga ko  ingabo za M23 ziramutse zerekeje muri ibyo bice, Abanyamulenge bamaze igihe bagoswe n’ingabo z’u Burundi bashobora kubona ubwinyagamburiro.

Yakomeje agira ati: ”Kugira ngo M23 bagere mu Minembwe bashobora guca mu Mijyi mitoya itandatu, iyo Mijyi yose iregeranye.”

Avuga ko muri ibyo bice byiganjemo FDLR kuko bahamaze imyaka irenga 30 bahatuye, bakaba banahakorera.

Teritwari ya Mwenga ifite ubuso burenga kilometero kare 11,000.

MUHIZI ELISÉE
UMUSEKE.RW