Mu rwego rwo guhuza imbaraga zigamije Iterambere rya Ruhago y’u Rwanda, Minisiteri ya Siporo, yatangiye ubufatanye n’Ihuriro ry’Abakiniye ikipe y’Igihugu, Amavubi rizwi nka ‘FAPA’.
Ku wa Kabiri, tariki ya 4 Ugushyingo 2025, ni bwo Minisitiri wa Siporo, Nelly Mukazayire ari kumwe n’Umunyamabanga wa Leta muri iyi Minisiteri, Rwego Ngarambe, bakiriye abagize Ihuriro ry’Abakiniye Amavubi (FAPA).
Abarimo Murangwa Eric Eugène uyobora FAPA, umutoza, Nshimiyimana Eric umwungirije, Haruna Niyonzima, Jimmy Mulisa, Gasingwa Michel ndetse na Iragena Oscarie, ni bo bahagarariye abandi muri ibi biganiro.
Ibiganiro byibanze ku bufatanye mu guteza imbere umupira w’amaguru muri gusangiza urubyiruko ubunararibonye biciye mu mikino y’amashuri, Iterambere ry’Amakipe y’Igihugu n’indi mishinga.
Ubusanzwe FAPA, isanzwe ikora ibikorwa bitandukanye birimo ubujyanama ku batoza b’abana, gutegura amarushanwa y’abato n’ibindi bigamije Iterambere rya Ruhago y’u Rwanda.
UMUSEKE.RW
