Imwe mu nkuru ziri kuvugwa mu mikino y’umunsi wa Kane wa shampiyona y’Abagore y’Icyiciro cya Mbere, harimo intsinzi ya Indahangarwa WFC yakuye kuri Forever WFC y’i Kigali mu gihe Kamonyi WFC yo yatsinze Rayon Sports WFC ibitego 3-2.
Kuri iki Cyumweru, tariki ya 9 Ugushyingo 2025, ni bwo hasojwe imikino y’umunsi wa Kane wa shampiyona y’abagore y’Icyiciro cya mbere. Ikipe ya Indahangarwa WFC yari i Kigali, yatsinze Forever WFC ibitego 3-1 maze isubira mu Karere ka Kayonza yemye.
Undi mukino watunguye benshi mu bakunzi ba ruhago y’abagore, ni uwahuje Kamonyi WFC na Rayon Sports WFC ku kibuga cyo ku Ruyenzi. Iyi kipe yo mu Nzove yari itaratakaza umukino n’umwe, yahatsindiwe ibitego 3-2.
AS Kigali WFC iterwa inkunga n’Umujyi wa Kigali, yongeye gutakaza umukino wa Kane. Iyi kipe itozwa na Mukamusonera Théogenie, yatsinzwe na Bugesera WFC igitego 1-0, uba umukino wa Kane nta manota yuzuye ibona.
Ibyavuye mu yindi mikino:
- Macuba WFC 0-3 Police WFC
- Inyemera WFC 0-2 APR WFC
- Nyagatare WFC 0-2 Muhazi United WFC
UMUSEKE.RW
