Umuyobozi Mukuru wa Unity Club Intwararumuri, Madamu Jeannette Kagame, yagaragaje ko Gahunda ya “Ndi Umunyarwanda” yagize uruhare mu komora ibikomere by’amateka mabi u Rwanda rwanyuzemo, iba umusingi wubakiweho igihugu kizira amacakubiri.
Ni ubutumwa yageneye Abanyarwanda muri iki gihe Umuryango Unity Club Intwararumuri utegura Ihuriro ngarukamwaka rya 18.
Ubutumwa bwa Madamu Jeannette Kagame, bugira buti “Mu rugendo rwo kongera kubaka u Rwanda, Ndi Umunyarwanda yabaye icyomoro cy’ibikomere twasigiwe n’amateka mabi, iba umusingi wubakiweho igihugu kizira amacakubiri, gishyize imbere indangagaciro na kirazira by’umuco nyarwanda.”
Bukomeza buti ” Uwambaye Ubunyarwanda agendana ubudahangarwa mu ngamba zose, dukomeze kwimakaza ihame ndakuka ry’Ubunyarwanda, by’umwihariko turirage abato.”
Unity Club ni umuryango washinzwe na Madamu Jeannette Kagame ku wa 28 Gashyantare 1996, ukaba ugizwe n’abayobozi bari muri Guverinoma, abayihozemo, n’abo bashakanye.
Washinzwe hagamijwe gutanga umusanzu mu kwimakaza umuco w’ubumwe n’amahoro, byo nkingi z’iterambere rirambye.
Ugira uruhare runini mu kwimakaza ubumwe n’ubwiyunge ndetse kwita ku buzima bw’abarokotse Jenoside yakorewe Abatutsi mu 1994.
Unity Club yashyize imbaraga mu kwita ku mfubyi no gukangurira imiryango gufata abana, ndetse abari bakuze ibubakira inzu zo kubamo.
Mu 2014, uyu Muryango wiyemeje gushakira ababyeyi b’incike za Jenoside, igisubizo kirambye ku bibazo bari bafite, ahanini kuko babaga bonyine.
Hubatswe amazu y’Impinganzima, yatumye aba babyeyi babona iby’ibanze mu buzima.
Unity Club yiyemeje gukomeza kugira ibiganiro hagati y’abanyamuryango mu guha igihugu icyerekezo; gukomeza guhangana n’ingengabitekerezo ya Jenoside; gufasha ibyiciro byihariye birimo urubyiruko n’ababyeyi.
MUGIRANEZA THIERRY/ UMUSEKE.RW
