MUHANGA: Mu Rukiko Rukuru urugereko rwa Nyanza rwaburanishije abagabo bane bashinjwa guhoza ku nkeke, gukubita no gukomeretsa, maze abagore babo batakambira Urukiko basaba ko barekurwa.
Iburanisha ry’ubujurire ryabereye mu Karere ka Muhanga ahakorewe iki cyaha cyo guhoza ku nkeke, gukubita no gukomeretsa mu rwego rwo kwegereza abaturage Ubutabera.
Urukiko Rukuru Urugereko rwa Nyanza ruvuga ko mu kwezi kwahariwe ubutabera bifuje ko izi manza z’abashinjwa guhoza ku nkeke, gukubita no gukomeretsa baziburanishiriza hafi y’imiryango yabo.
Urukiko Rukuru ruvuga ko abo bagabo baburanye bemera icyaha ku rwego rwa mbere ibyaha benshi bashinjwaga ari uguhoza ku nkeke, gukubita no gukomeretsa uwo bashyingiranywe.
Abo bagore baje imbere y’Urukiko basabira abagabo babo imbabazi, banabwira Urukiko ko bifuza ko imiryango isubirana bagasangira iminsi mikuru y’Ubunani na Noheli.
Ubushinjacyaha bushingiye ko nyuma yo gucirwa urubanza n’Urukiko Rwisumbuye rwa Muhanga, hasohotse amategeko 2 rimwe riteganya ibihano bito ku cyaha cyo gukubita no gukomeretsa, n’iriteganya uburyo bwo kugabanya ibihano ryateganije ko bigabanuka bikaba bito ugereranije n’iryari risanzwe.
Ubushinjacyaha bwanashingiye kandi ku miburanishirize igendeye ku byo bita(Victim offender mediation) aho uwakorewe icyaha yumvikana n’uwo yagikoreye.
Muri iri buranisha, Ubushinjacyaha byose bwabihereyeho busaba ko ibihano byabo byagabanywa.
Urukiko nyuma yo kwiherera rwasomye imanza 4 kuri 15 zose hamwe Urukiko rugomba kuburanisha,rwanzura ko abashinjwa uko ari 4 bagomba gutaha.
Urukiko ruvuga ko izindi dosiye 11 z’abaregwa ibi byaha zizasomwa Taliki 16 Mutarama 2026.
MUHIZI ELISÉE
UMUSEKE.RW i Muhanga.
