Gen. Mamady Doumbouya, umusirikare utegetse Guinée-Conakry kuva mu 2021, yatsinze amatora ya Perezida muri icyo Gihugu ibimuha ububasha bwo kugitegeka mu myaka irindwi iri imbere.
Ni amajwi yatangajwe mu ijoro ryo ku wa Kabiri tariki ya 30 Ukuboza 2025.
Komisiyo y’Igihugu y’Amatora muri icyo Gihugu giherereye mu Burengerazuba bwa Afurika, yatangaje ko amajwi y’agateganyo agaragaza ko Mamady Doumbouya yatsinze amatora n’amajwi 86.72%.
Yakurikiwe na Abdoulaye Yéro Baldé uyobora ishyaka rya Front démocratique de Guinée (Frondeg) ufite 6,59 %.
Ni amatora yari yabaye ku wa 28 Ukuboza 2025, yitabirwa ku kugero cya 80%.
Ibyavuye mu matora bizemezwa n’Urukiko rw’Ikirenga mu gihe kitarenze iminsi itandatu.
Mamady Doumbouya yageze ku butegetsi muri Guinée-Conakry mu 2021 ahiritse Alpha Conde.
Uyu mugabo wari ufite ipeti rya Colonel yavugaga ko we n’abasirikare baje gusubiza ibintu mu buryo ubundi ubutegetsi bugahabwa abasivili ariko nyuma byarahindutse ariyamamaza.
MUGIRANEZA THIERRY/ UMUSEKE.RW
