Muhanga: Urukiko Rwisumbuye rwa Muhanga, rwemeje ko Mukamutali Valérie wari Gitifu w’Umurenge wa Kibangu, na Munyampundu Védaste wari Umucungamari bakomeza gufungwa iminsi 30 by’agateganyo.
Iki cyemezo Urukiko Rwisumbuye rwa Muhanga rwagifashe mu usomwa ry’urubanza ryabaye ku mugoroba wo kuri uyu wa kabiri taliki ya 02/12/2025.
Urukiko rusanga nta mpamvu zikomeye zatuma Mukamutali Valérie, na Munyampundu Védaste barekurwa. Urukiko rwemeje ko baramutse barekuwe bashobora gutinya ingaruka z’icyaha bagacika ubutabera.
Rwategetse ko Mukamutali Valérie na Munyampundu Védaste bakomeza gukurikiranwa bafunzwe, ruvuga ko impamvu z’Ubujurire zidafite ishingiro.
Urukiko ruvuga ko impamvu 7 Mukamutali Valérie yari yatanze zidahawe agaciro ku cyemezo cy’ifungwa n’ifungura, kimwe n’impamvu 4 Munyampundu Védaste yari yabwiye Urukiko, na zo ngo ntizifite ishingiro.
Rwemeje ko bagomba kuzigaragaza baburana mu mizi y’urubanza.
Urukiko rwemeje ko impamvu abunganizi batanze mu rubanza rw’Ubujurire zidafite ishingiro, ko ingero batanze mu iburanisha zirebana n’urubanza mu mizi.
Urukiko rwagaragaje ko hari impamvu zikomeye zituma bakurikiranwa bafunze.
Urukiko rwavuze ko nubwo gufunga atari ihame, ariko Urukiko arirwo rusuzuma niba ibyo abaregwa bashinjwa bigize icyaha.
Urukiko rusanga icyemezo Urukiko rw’Ibanze rwa Nyamabuye rwafashe cyo gufunga Mukamutali Valérie, na Munyampundu gifite ishingiro cyane ko batagaragaza irengero ry’amafaranga bashinjwa kunyereza.
Rusanga hari impamvu zumvikana bityo ko gukurikiranwa bafunzwe ari ryo hame cyane ko bashobora kubangamira iperereza.
MUHIZI ELISÉE
UMUSEKE.RW/Muhanga.
