Imitwe ibiri ya Wazalendo ikorana n’ingabo za Congo, FARDC yamaze iminsi ibiri ihanganye. Ni Mai-Mai Lamuka na Patriotes résistants congolais (PARECO), iyobowe na Mutayomba n’uwitwa Kigingi.
Radio Okapi ivuga ko imirwano yabo yatangiye ku Cyumwru igeza ku wa Mbere, barwanira ahitwa Katoyi, muri Gurupema Ufamandu II, Teritwari ya Masisi, muri Kivu ya Ruguru.
Ku Cyumweru mu gitondo ngo Mai-Mai Lamuka, iyobowe na Noah Maachano, yashakaga kujya ku biro bya Segiteri Katoyi.
Baje guhurira mu nzira n’abarwanyi ba PARECO, ubwumvikane buke buravuka, batangira kurasana ubwo, imirwano yiriza umunsi, kugeza ku wa Mbere.
Iyi mirwano yatumye abaturage bahunga bamwe berekeza ahitwa i Mutindi, abandi bahungira mu bihuru.
Agahenge kabonetse ku wa Kabiri w’iki cyumweru, abaturage bakomeza imirimo.
Wazalendo biganjemo urubyiruko rw’abasivile bahawe intwaro na Perezida Felix Tshisekedi kugira ngo bafatanye n’ingabo za leta kurwanya AFC/M23.
Gusa muri iyi minsi bimaze kuba ikibazo gikomeye, bamwe babona ari igihe kigeze ngo bamburwe intwaro batarahinduka imitwe ikomeye irwanya leta.
Uretse gushyamirana kwa hato na hato hagati yabo bapfa inyungu zitandukanye, bakunze kumvikana bahangana n’ingabo za leta ya Congo bafatanyije urugamba.
UMUSEKE.RW
