Ikigo cy’Igihugu cy’Iteganyagihe, Meteo Rwanda, cyatangaje ko mu minsi icumi ya mbere y’ukwezi k’Ukuboza kwa 2025, hateganyijwe imvura iri hagati ya milimetero 10 na 50, ikaba iri hasi y’ikigero cy’impuzandengo y’isanzwe igwa muri iki gice yabaga iri hagati ya milimetero 18 na 85.
Umubare w’iminsi imvura izagwamo uri hagati y’iminsi itatu n’itanu bitewe n’imiterere ya buri hantu.
Ni ibikubiye mu nyandiko y’iteganyagihe ry’igice cya mbere cy’Ukuboza, kuva tariki ya 1 kugeza ku ya 10, iki kigo cyasohoye.
Meteo Rwanda yagaragaje ko mu Rwanda hateganyijwe imvura iri hagati ya milimetero 10 na 50, ikaba iri hasi y’ikigero cy’impuzandengo y’isanzwe igwa muri iki gice, ikaba iteganyijwe mu matariki y’intangiriro z’ukwezi.
Iki kigo cy’iteganyagihe kivuga ko imvura iri hagati ya milimetero 40 na 50 iteganyijwe mu Turere twa Rubavu na Nyamasheke, Akarere ka Rusizi uretse mu kibaya cya Bugarama, Akarere ka Rutsiro uretse igice gito cy’uburasirazuba bwako, amajyaruguru n’uburengerazuba bw’Uturere twa Musanze na Nyabihu ndetse n’uburengerazuba bw’Uturere twa Karongi, Nyamagabe na Nyaruguru.
Giti “Imvura iri hagati ya milimetero 30 na 40 iteganyijwe mu kibaya cya Bugarama, ahasigaye mu Turere twa Musanze, Nyabihu, Rutsiro na Karongi, ibice byo hagati by’Uturere twa Nyamagabe na Nyaruguru, ibice by’amajyaruguru n’iby’uburengerazuba by’Uturere twa Burera na Gakenke, amajyaruguru y’uburengerazuba bw’Akarere ka Muhanga ndetse no mu Karere ka Ngororero uretse ibice bito by’uburasirazuba bwako.”
Meteo Rwanda ikomeza ivuga ko imvura iri hagati ya milimetero 20 na 30 iteganyijwe ahasigaye mu Turere twa Ngororero, Nyamagabe na Nyaruguru, ibice byo hagati by’Uturere twa Burera na Gakenke, uburengerazuba bw’Uturere twa Ruhango, Nyanza na Huye, amajyepfo y’Akarere ka Gisagara ndetse n’igice kinini cy’uburengerazuba n’icy’amajyaruguru cy’Akarere ka Muhanga.
Ahasigaye mu Gihugu hateganyijwe imvura iri hagati ya milimetero 10 na 20.
Ivuga ko kandi umuyaga uringaniye ushyira kuba mwinshi ufite umuvuduko uri hagati ya metero 4 na 10 ku isegonda ari wo uteganyijwe mu Gihugu, naho ubushyuhe bwo hejuru buteganyijwe buzaba buri hagati ya dogere Selisiyusi 19 na 31, naho ubushyuhe bwo hasi buteganyijwe buzaba buri hagati ya dogere Selisiyusi 6 na 18.
MUGIRANEZA THIERRY/ UMUSEKE.RW
