Komite y’Inzibacyuho y’Umuryango wa Rayon Sports iyobowe na Murenzi Abdallah, yashyizeho inzego ziyunganira zirimo Murangwa Eugéne wayibereye umunyezamu.
Kuri uyu wa Kane, tariki ya 4 Ukuboza 2025, habaye ikiganiro cyahuje abanyamakuru n’ubuyobozi bw’Inzibacyuho bwa Rayon Sports. Ni ikiganiro cyari kigamije kugaragaza gahunda iyi Komite ifite mu mezi atatu yahawe n’Urwego rw’Igihugu rw’Imiyoborere, RGB.
Mu rwego rwo gushaka amaboko n’imbaraga zo gushyira ku murongo ibyo yasabwe na bagenzi be, Murenzi Abdallah yashyizeho Komisiyo enye zifite inshingano zitandukanye.
Imwe muri izo Komisiyo, ni iya Tekiniki igizwe na Gacinya Chance Denis, Gakwaya Olivier uyiyoboye, Kamali Gustave, Dr. Uwimana François Xavier, Amri Jean Paul, Muhirwa Prosper na Murangwa Eugène wayibereye umunyezamu mbere ya Jenoside yakorewe Abatutsi.
Hashyizweho kandi Komisiyo Ishinzwe Imiyoborere igizwe na Dr. Rwagacondo Emile Claude, Dr. Uwiragiye Norbert, Ignas Havugiyaremye, Kabagema Vivens, Muhizi Sued, Runigababisha Mike na Ahishakiye Phias.
Komisiyo Ishinzwe Umutungo igizwe na Nshimyabarezi Abraham, Kabiligi Yussuf, Ndikumukiza Révelien, Habyarimana Straton, Byiringiro Bernard, Rukundo Patrick na Ndikumana Jean Félix. Aba bazaba bayobowe na Akayezu José washinzwe Icungamutungo.
Hashyizweho kandi Komisiyo y’Amategeko igizwe na Me Ntagengwa Vital, Me Minani Faustin, Me Ingabire Diane, Me Mana Jean Paul na Me Ndikumana Faustin. Aba bose bashyizweho ngo bunganire iyi Komite y’Inzibacyuho, bafite inshingano zo kuzaba zageze ku nshingano bahawe mu gihe cy’amezi atatu ari imbere.
Bafite inshingano zirimo gusuzuma no kuvugurura amategeko y’Umuryango, gusesengura no kuvugurura inzego z’Imiyoborere hagenwa n’inshingano za zo, gusigasira Ubumwe n’Ubusugire bw’Umuryango wa Rayon Sports n’ibindi.
UMUSEKE.RW
