Ibicishije ku mbuga nkoranyambaga za yo, Rutsiro FC iterwa inkunga n’Akarere ka Rutsiro, yatangaje ko Niyonkuru Gustave ari we mutoza mukuru wa yo wasimbuye Bizumuremyi Radjab.
Kuri uyu wa Kabiri, tariki ya 16 Ukuboza 2025, ni bwo Niyonkuru Gustave yatangajwe nk’umutoza mukuru wa Rutsiro FC isanzwe ituye mu Karere ka Rubavu kubera kutagira Stade kw’Akarere ka Rutsiro.
Niyonkuru watoje ikipe y’Igihugu y’u Burundi, Vitalo’o y’iwabo i Burundi na Espoir FC y’i Rusizi, yasimbuye Bizumuremyi Radjab watandukanye na yo kubera umusaruro nkene.
Nyuma yo gutangazwa nk’uwaje mu kazi ke gashya, Gustave yahise anatangira inshingano zo gutoza iyi kipe yaraye ibonye intsinzi kuri Al-Hilal SC yo muri Sudani nyuma yo kuyitsinda ibitego 2-1 mu mukino wa shampiyona wabereye kuri Kigali Pelé Stadium.
UMUSEKE.RW
