Mu bihembo bitangwa n’Ishyirahamwe ry’Umupira w’Amaguru ku Isi, FIFA, Abanyarwanda barimo Kapiteni w’Amavubi, Bizimana Djihad watoye abarimo Achraf Hakimi n’umutoza we, Adel Amrouche watoye mugenzi we, Luis Enrique, bari mu batoye muri ibi bihembo.
Ku wa Kabiri, tariki ya 16 Ukuboza 2025 i Doha muri Qatar, habereye umuhango wo guhemba abakinnyi bitwaye neza muri uyu mwaka. Ni ibihembo ngarukamwaka bitangwa na FIFA.
Umufaransa, Ousmane Dembélé ukinira PSG na Aitana Bonmatí ukomoka muri Espagne akaba akinira FC Barcelone y’Abagore, ni bo batowe nk’abakinnyi beza bahize abandi mu 2025.
Ni umuhango witabiriwe n’abanyacyubahiro bari bayobowe na Gianni Infantino uyobora Ishyirahamwe ry’Umupira w’Amaguru ku Isi, FIFA.
Uretse abahize abandi mu byiciro byombi, mu bandi batowe, harimo abatoza b’umwaka. Igihembo cyatwawe na Luis Enrique utoza Paris Saint-Germain mu bagabo ndetse na Sarina Wiegman utoza Ikipe y’Igihugu y’u Bwongereza mu Bagore.
Gutanga ibi bihembo bishingirwa ku majwi y’abatoye barimo abatoza n’abakapiteni b’amakipe y’Ibihugu 211, itora ryo kuri internet ry’abafana n’abanyamakuru 200 bahagarariye abandi ku Isi muri buri gihugu. Itora rya buri cyiciro rigenerwa 25%.
Ku ruhande rw’u Rwanda, mu bagabo hatoye Umutoza w’Amavubi, Adel Amrouche, Kapiteni w’Ikipe y’Igihugu, Bizimana Djihad n’Umunyamakuru Nsabimana Eddie ukorera The NewTimes.
Mu bagore, hatoye Umutoza w’Amavubi y’Abagore, Casa Mbungo André; Kapiteni w’Ikipe y’Igihugu, Ndakimana Angéline n’Umunyamakuru, Kamukama Mugabo Annet.
Kapiteni w’ikipe y’Igihugu ya Argentine, Lionel Andrés Messi, yatoye Ousmane Dembélé, Kylian Mbappé na Lamine Yamal mu gihe Cristiano Ronaldo atatoreye Portugal, ahubwo iki gihugu cyatorewe na Bernardo Silva wahisemo Vitinha, Nuno Mendes na Ousmane Dembélé.
Muri aya matora, umukinnyi utowe bwa mbere abona amanota atanu, uwa kabiri akabona amanota atatu mu gihe uwo uhisemo bwa gatatu uba umuhesheje inota rimwe.
Uko Aabanyarwanda batoye mu bagabo
Umukinnyi w’umwaka:
– Bizimana Djihad: Achraf Hakimi, Ousmane Dembélé na Lamine Yamal.
– Adel Amrouche: Achraf Hakimi, Kylian Mbappé na Mohamed Salah.
– Nsabimana Eddie: Ousmane Dembélé, Lamine Yamal na Kylian Mbappé.
Umutoza w’umwaka:
– Bizimana Djihad: Luis Enrique, Arne Slot na Mikel Arteta.
– Adel Amrouche: Roberto Martínez, Luis Enrique na Hansi Flick.
– Nsabimana Eddie: Luis Enrique, Enzo Maresca na Hansi Flick.
Uko Abanyarwanda batoye mu bagore:
Umukinnyi w’umwaka:
– Casa Mbungo: Lucy Bronze, Alexia Putellas na Temwa Chawinga.
– Ndakimana Angéline: Sandy Baltimore, Patri Guijaro na Leah Williamson.
– Annet Kamukama: Alessia Russo, Leah Williamson na Clàudia Pina.
Umutoza w’umwaka mu bagore:
– Casa Mbungo: Sonia Bompastor, Renée Slegers na Sarina Wiegman.
– Ndakimana Angéline: Renée Slegers, Sarina Wiegman na Seb Hines.
– Annet Kamukama: Sarina Wiegman, Renée Slegers na Sonia Bompastor.
UMUSEKE.RW
