Trump yatangaje urutegereje Perezida mushya wa Venezuela

Perezida Donald J. Trump, mu gisa n’iterabwoba, yavuze Perezida w’inzibacyuho wa Venezuela, Delcy Rodríguez, ko nadakora “ibyo Amerika ishaka” ashobora “kwishyura ikiguzi” gikomeye cyane, kirenze icya Nicolás Maduro.

Trump, uzwi nk’umutaripfana, yabwiye The Atlantic ibi mbere y’uko Nicolás Maduro n’umugore we bagezwa imbere y’urukiko i New York kuri uyu wa Mbere.

Muri icyo kiganiro cyo ku Cyumweru, yashimangiye ko mu gihe Perezida Rodríguez atashyira mu bikorwa ibyifuzwa na Amerika azahura n’akaga karenze aka Maduro.

Nta kwicuza na busa, Trump yavuze ko guhindura ubutegetsi muri Venezuela ari cyo kintu cyiza kuruta ibindi byose.

Ni mu gihe kandi, Trump yemeje ko Amerika “izayobora” Venezuela kugeza igihe hazabonekera ubutegetsi bwiza.

Trump yongeyeho ko amakompanyi ya peteroli ya Amerika azajya muri Venezuela gutunganya ibikorwa remezo, hanyuma atangire kwinjiriza amafaranga abaturage.

Mu nama ye ya mbere n’abagize Guverinoma, Perezida Delcy Rodríguez yavuze ko abaturage be n’Akarere bakeneye amahoro n’ibiganiro, badakeneye intambara.

Yavuze ko yiteguye gufatanya na Amerika mu gutegura ahazaza ha Venezuela, kandi bagatera intambwe iganisha ku mubano w’ubwubahane hagati y’ibihugu byombi.

Amerika ishinja Maduro kuyobora umutwe w’iterabwoba ukoresha ibiyobyabwenge, mu gihe asanzwe anashinjwa ibyaha bya magendu y’ibiyobyabwenge n’intwaro.

Maduro avuga ko ibitangazwa na Amerika ari ibinyoma, aho yakoresheje intambara ku biyobyabwenge nk’urwitwazo rwo kumukura ku butegetsi no gusahura peteroli ya Venezuela.

Delcy Rodríguez, wari Visi Perezida wa Maduro, ubu ni we Perezida w’inzibacyuho wa Venezuela, aho ashyigikiwe n’igisirikare.

Byitezwe ko uyu mugore w’imyaka 56 y’amavuko arahirira kuyobora iki gihugu kuri uyu wa Mbere, i Caracas, saa munani z’amanywa z’i Kigali.

NDEKEZI JOHNSON / UMUSEKE.RW