Africa n’Uburayi bagiye gufatanya basenye udutsiko ducuruza abantu muri Libya – UMUSEKE

Africa n’Uburayi bagiye gufatanya basenye udutsiko ducuruza abantu muri Libya

Abidjan – Ku musozo w’inama y’iminsi ibiri yahuje Umuryango w’Ubumwe bwa Africa n’Umuryango w’Ubumwe bw’Uburayi, impande zombi zemeranyijwe guhuza imbaraga bakarimbura udutsiko tw’abanyabyaha ducuruza abimukira b’Abanyafurika muri Libya.

Abakuru b'ibihugu na za Guverinoma batandukanye bitabiriye iyi nama.

Abakuru b’ibihugu na za Guverinoma batandukanye bitabiriye iyi nama.

Mu itangazo impande zombi zihuriye, abayobozi ba Africa n’Uburayi bamaganye ibikorwa bya turiya dutsiko bitesha agaciro ikiremwamuntu. Ndetse biyemeza gukorera hamwe bagahita batangira ibikorwa byo kurimbura ibikorwa bya turiya dutsiko ku nyungu z’abimukira n’impunzi.

Abayobozi b’impande zombi kandi bimeranyijwe gutangiza ibikorwa byo kwigisha urubyiruko ububi bw’ingendo abimukira banyuramo, ndetse no kubamenyesha iby’udutsiko tw’abanyabyaha tuba muri izo nzira.

Bumvikanye kandi ku gufasha Libya guhangana na turiya dutsiko binyuze mu muryango mpuzamahanga, ndetse no guhita hatangira ibikorwa byo bariya banyabyaha (bacuruza abantu) imbere muri Libya no hanze yayo, ndetse bashyikirizwe ubutabera.

Ubu bufatanya mpuzamahanga ngo buzaba burimo ibikorwa bya Gipolisi n’iby’inzego z’ubutabera, harimo no gufatira imitungo y’abazafatwa bagakatirwa.

Abakuru b’ibihugu kandi bagaragaje ko ari ngombwa ko impunzi n’abimukira barushaho kwitabwaho, kandi abifuza gusubira mu bihugu byabo ku bushake bagafashwa gutaha, no gushaka igisubizo kirambye cyakemura ubuhunzi.

Libya yashimiwe kuba yaratangiye iperereza kubacuruza abimukira, yanemeye koroshereza inzego z’umutekano z’umuryango mpuzamahanga ziza gutanga ubufasha mu kurwanya turiya dutsiko tw’abanyabyaha.

Perezida w’Ubufaransa Emmanuel Macron, yatangaje bitazaba ari nko gutera Libya ahubwo abapolisi n’abakozi b’inzego z’iperereza bazoherezwa muri Libya ngo bazaba bagiye gutanga ubufasha.
Umuryango wa Africa yunze ubumwe, Umuryango w’ubumwe bw’uburayi, Umuryango w’abibumbye, Guverinoma ya Libya, ibihugu abimukira bakunze kunyuramo, ndetse n’ibyo bakomokamo biyemeje gukorera hamwe mu kurandura iki kibazo.

Abakuru b’ibihugu bya Africa n’Uburayi bemeje ko igisubizo cy’ikibazo cy’abimukira b’Abanyafurika gishamikiye bya hafi ku bituma bava mu bihugu byabo, kandi bisaba n’umwanzuro wa Politike ku kibazo cya Libya.

Umuryango w’ubumwe bw’uburayi uri gukusanya Miliyari 44 z’ama-Euro ushaka gushora muri Africa, kuko ngo kuzamura ubukungu bwa Africa bizatuma imibereho y’abanyafurika ihinduka kandi n’akazi kaboneke, bityo abanyafurika biganjemo urubyiruko bareke gukomeza gupfa barwana no kujya Iburayi.

Mu kwezi gushize kw’Ugushyingo Televiziyo y’Abanyamerika “CNN” yashyize hanze amashusho y’abimukira bari gucuruzwa nk’ihene mu masoko y’ibanga yo muri Libya ku mafaranga y’u Rwanda atageze no ku bihumbi 350 (400 $). Ibi byatumye abantu hirya no hino ku isi bahagurukira iki kibazo, ndetse habaho n’imyigaragambyo mu bihugu bitandukanye bya Africa n’Uburayi.

Muri uyu mwaka wonyine, abaimukira basaga ibihumbi 110 bamaze kwambuka inyanja ya Mediteranean bajya iburayi, mu gihe umwaka ushize barengaga ibihumbi 180 nk’uko umuryango mpuzamahanga ushinzwe abimukira ubivuga.

UMUSEKE.RW

6 Comments

  1. Kizigenza.

    01/12/2017 at 7:19 pm

    Narebye kuri tereviziyo Perezida wa Guinné ari nawe ukuriye Union Africaine ubu yihandagaza aravuga ngo Afrika igeze aho kwishakamo ibisubizo ubwayo ariko ngo ntibizanayibuza kwegera Union Europeenne mu bundi bufasha. Ibi yabivuze ubwo umwami wa Maroc yavuzeko yitanze indege zizacyura abanyafurika bose baheze muri Libiya. Ubwo se ibisubizo bishatsemo ni ibihe kandi ari n’ubundi umuzungu witanze? abo ba perezida bose ba Afrika bose bari aho ntihagira n’umwe uvuga ngo nshyizeho budget yo gucyura abaturage banjye bahagamye muri Libiya. Mbese aba birabura bategerejeko abazungu babazanir’impunzi zabo ku bibuga by’indege ubundi ba ministre bashinzwe ububanyi n’amahanga bakajya kwifotozanya n’izo mpunzi ngo bagiye kuzakira. Ko ari byo tuvuga mukaduseka koko, abaperezida ba Afrika bashinzw’iki mu mirimo yabo? Uziko n’abamaze gutaha batashye ari abasirikare b’abafaransa babacyuye? Ni nde wigez’avuga ngo nakoze ibarura, mfit’abantu bangana batya muri Libiya ngiye kubashakir’uko bataha? Ahubwo OIM n’abazungu nibatabacyura muzumva n’abagihumeka bashizemo umwuka. Aba ni abaperezida cyangwa c’est un zoo de babouins umugani wa Gondouanais Lamda?

  2. Mukoloni

    01/12/2017 at 11:09 pm

    Umuti wamenyo gusa.Ese mbere ya vidz ya CNN ntabwo bari babizi, ntaza rwasiri-DMI-CMI DGSE CIA zari zibizi? Koko ibyo hari numwe ushobora kubyemera?None bose barashidutse Ese Israeli ntiri hafi kujugunya abirabura b’impunzi mu Rwanda? Yewe Naragenze ndabona kabisa.

  3. nike

    02/12/2017 at 8:30 am

    Kadafi yabwiye abanya libya ko nyuma yingomaye bazarwara amavunja kdi ntagihugu bazongera kugira kdi bazasuzugurwa ibi rero bigiye kubabaho imyaka 120 ntawuhumeka ntawucira ntawumira nibindi biracyaza.

  4. Gakuru

    03/12/2017 at 5:29 am

    @Kizigenza uri umuntu wu mugabo cyane najye rwose byaranyobeye niba dutegekwa na bantu bagira ubwenge cyangwa, uziko najye nabibonye nta mukuru wa Africa numwe wigeze avuga uko bazavanwayo ahubwo wumvaga basa nkaho barimo kubica kuruhande,mbese bari barimo kwirindiriza ngo abazungu bazababazanire ku bibuga byabo
    Africa we genda waragendesheje

  5. Rutaro

    03/12/2017 at 10:26 am

    Abaperezida Africa ifite bamwe basigaye bantera isesemi.Birumvikana ariko kuko benshi batorwa ku ngufu.

    • ngabo

      05/12/2017 at 7:41 am

      @Rutaro batorwa nande?uzabanze umenye bose uko baje ku butegetsi uzasanga bose ari banvuye kure ntibatorwa baritora abandi bakazira ku ruhembe rw’umuheto

Ibitekerezo

Your email address will not be published. Required fields are marked *




Amakuru

info@umuseke.rw
Phone: +250 788516551
Phone: +250 788772818

Kwamamaza

sales@umuseke.rw
+25 0788772818
+25 0785383188

Aho dukorera

Kigali - Rwanda
Gasabo - Remera
Sonatube
KG 1 Ave 49

Umuseke since 2011 - Copyright 2017