Ikipe y’abagore ya Ghana yitwa Black Queens mu mukino w’umupira w‘amaguru yaraye ikinnye n’iyo muri Algeria, yitwaye neza iyitsinda 1-0. Amarushannwa y’iki gikombe cy’Afurika cy’amakipe y’abagore ari kubera Accra muri Ghana.
Gladys Amfobea niwe watsindiye Black Queens igitego
Umukino ufungura irushanwa ukaba waraye ukiniwe kuri Accra Sports Stadium urangira Ghana ifite amanota atatu nyuma y’igitego yabonye gitsinzwe na Gladys Amfobea ku munota wa 13.
Undi mukino wakinwe kuri uyu wa Gatandatu wahuje ikipe y’igihugu ya Mali na Cameroon warangiye Cameroon itsinze Mali 2-1. Ikipe ya Mali niyo yafunguye amazamu ku munota wa 57 ku gitego cyatsinzwe na Aissata Traore.
Ikipe y’igihugu ya Cameroon yaje kubona igitego cya mbere ku munota wa 71 gitsindiwe na Meffometou naho igitego cya kabiri cyabahesheje intsinzi kinjiye ku munota wa 73 gitsinzwe na Ajara.
Umukino uteganyijwe kuri iki cyumweru ukomeye uraza guhuza ikipe y’igihugu ya Nigeria ifite ibikombe 10 iza gukina n’ikipe y’Afurika y’Epfo yitwa Banyana Banyana.
Nigeria ifite iki gikombe inshuro icumi ((1991, 1995, 1998, 2000, 2002, 2004, 2006, 2010, 2014 na 2016)
Uko imikino yarangiye
Ghana 1-0 Algeria
Mali 1-2 Cameroon
Imikino itaganyijwe
15:30: Nigeria Vs South Africa
18:30: Zambia Vs Equatorial Guinea
The Black Queens yo muri Ghana
Fennecs yo muri Algeria
Yvonne IRADUKUNDA
UMUSEKE.RW