“BKGL” igizwe n’abarinda umutekano w’abakomeye yahaye Frw 1 800 000 abamugariye ku rugamba

Iki gikorwa cyabaye kuri uyu wa gatanu aho urubyiruko rugizwe rurinda umutekano w’abantu bakomeye n’ibyamamare ruri mu itsinda “BKGL” (bakunda kubita ‘bouncers’) ryatanze inkunga y’amafaranga miliyoni 1,8 ku bahoze ari abasirikare bamugariye ku rugamba bo mu kagari ka Nyarugunga mu karere ka Kicukiro.

Itsinda ‘BKGL’ n’abayobozi muri Ministeri y’Ingabo na Komisiyo yo gusezerera abavuye mu ngabo bashyikiriza sheki ya Frw 1 800 000 abamugariye ku rugamba

Kanimba Bosco uyobora BKGL yatangiye asobanura iby’itsinda ryabo, ko ari urubyiruko rwishyize hamwe rukora ibijyanye no gucunga umutekano  mu tubari, ndetse no mu bitaramo bitandukanye bibera mu gihugu, bagafatanya na Polisi y’Igihugu n’izindi nzego zishinzwe kurinda umutekano.

Yavuze ko babizi neza ko urubyiruko rwo ha mbere rwatojwe runigishwa gukora bibi bihungabanya umutekano w’igihugu, ndetse bagira uruhare mu ishyirwa mu bikorwa rya Jenoside yakorewe Abatutsi, akaba ari na rwo rwafashe iyambere mu kuyikora, ariko ngo bashima Perezida Paul Kagame wayoboye ingabo mu mugambi wo kubohora igihugu.

Kanimba avuga ko mu byo bakora bazokomeza gutera ikirenge mu cya bakuru babo bagerageza kubungabunga umutekano mu bitaramo, mu tubari n’ahandi bikenewe.

Mu izina ry’abandi kandi yavuze ko biteguye gukoresha imbaraga zabo mu gukora icyateza imbere igihugu cy’u Rwanda.

Yavuze mu kazi kabo bagerageza gukora neza, ndetse ngo babashije guta muri yombi umugabo washukaga urubyiruko na bo barimo ngo bajye mu mutwe ushaka gutera u Rwanda uturutse muri Tanzania bamushyikiriza abashinzwe umutekano, ngo bazaharanira kongera ubumenyi bwabo binyuze mu mahugurwa.

Uwaje ahagarariye umuyobozi wa Komisiyo yo Gusezerera no Gusubiza mu buzima buzima busanzwe ingabo zavuye ku rugerero, yashimiye uru rubyiruko igitekerezo kiza bagize cyo kwishyira hamwe nk’abakora akazi ko kurinda umutekano mu bitaramo n’ahandi.

Yavuze ko Komisiyo ahagarariye ari umwihariko w’Abanyarwanda, ko nta handi wapfa kuyisanga. Yavuze ko bamaze gusubizwa mu buzima no gusezerera mu ngabo abarenga 100 000, ariko ngo by’umwihariko bita cyane ku babuze ingingo z’umubiri kandi babiha agaciro gakomeye.

Kuri aba basirikare bamugariye ku rugamba ngo abari mu kiciro cya mbere bahabwa amafaranga 50 000 buri kwezi, bakavuzwa ku buntu, kandi bakagenerwa n’inzu yo kubamwo, abo mu kiciro cya kabiri bagenerwa Frw 35 000, bakavuzwa ndetse na bo bakagenerwa inzu yo guturamwo, abo mu kiciro cya gatatu bahabwa frw 25 000, bakishyurirwa ubwisungane mu kwivuza, aba ngo baba bashobora kujya gukora imirimo runaka, naho abo mu kiciro cya kane bahabwa Frw 20 000 na bo bakanahabwa ubwisungane mu kwivuza.

Col Ruzibiza Charles waje uhagarariye Minisiteri y’Ingabo yijeje uru rubyiruko ko inkunga yabo izakoreshwa neza mu bikorwa bifitiye akamaro aba bayigenewe.

Yababwiye ko izi ngabo zamugariye ku rugamba zishobora kubafasha byinshi mu bijyanye n’inama n’uburyo bashobora kunoza imikorere yabo neza kuko bafite byinshi bazi.

Ndekezi John uhagarariye aba bamugariye ku rugamba yashimiye na we urwo rubyiruko ko bafite ibitekerezo nk’ibyo bari bafite igihe babohoraga igihugu.

Ndekezi John uhagarariye abamugariye ku rugamba aha ikaze aba basore baje kubatera inkunga

Maj Gasangwa na we wahoze mu ngabo z’u Rwanda ubu akaba ari umujyanama wa BKGL

Kanimba Bosco uyobora iri tsinda yaganirizaga abari aho ibyo bakora

Col Ruzibiza Charles waje ahagarariye Minisiteri y’Ingabo

Urubyiruko n’abamugariye ku rugamba bateze amatwi Col Ruzibiza Charles

Aba ni abagize BKGL

Uwari ahagarariye Komisiyo yo gusubiza mu buzima busanzwe abavuye ku rugerero

Abagize BKGL harimo n’abagore

AMAFOTO@MUGUNGA Evode/UMUSEKE

MUGUNGA Evode
UMUSEKE.RW