Burundi: Agathon Rwasa yavuye mu bwihisho, arashaka gusimbura Nkurunziza – UMUSEKE
RALC Ntibavuga bavuga

Burundi: Agathon Rwasa yavuye mu bwihisho, arashaka gusimbura Nkurunziza

Hashize imyaka itatu yibera ahatazwi, Agathon Rwasa, wahoze ari umuyobozi w’inyeshyamba za FNL (Forces nationales de libération du Burundi) kuri uyu wa kabiri biteganyijwe ko aza kugaragara muri rubanda. Intego ye ni amatora ya 2015 y’umukuru w’igihugu kuko ashaka gusimbura Pierre Nkurunziza.

Agathon Rwasa/photo Internet

Agathon Rwasa/photo Internet

Kuva mu kwezi kwa gatandatu 2010, Agathon Rwasa yaburiwe irengero avuye aho yari atuye mu Kiriri, Bujumbura. Bamwe baketse ko agiye gushing undi mutwe nyuma y’uko FNL yari imaze gusa n’iyumvikana na Nkurunziza wariho yiyamamaza mu matora icyo gihe.

Amatora ya Perezida i Burundi ya 2010 yakurikiwe n’umutekano mucye ndetse bamwe banayaguyemo, Agathon Rwasa yari ahatazwi we.

Rwasa byagiye bivugwa ko amaze iki gihe cyose mu duce rwa Kivu y’Epfo muri Congo Kinshasa, abandi ko yari muri Tanzania abandi bakavuga ko yabaga muri Zambia.

Aimé Magera umuvugizi we watangaje ko kuri uyu wa 06 Kanama ari bugaragare, yavuze ko Agathon Rwasa atigeze ava mu Burundi. Yemeza ko yabaga mu baturage bamubikiraga ibanga kandi bakanamutunga.

Kugeza ubu nta mishyikirano irabaho hagati y’uyu wahoze ayobora inyeshyamba na Leta nkuko bitangazwa na RFI.

Umuvugizi we yatangaje ko Agathon Rwasa aje kwiyegereza abaturage no kubahuriza hamwe bagamije gutsinda amatora ya 2015 y’umukuru w’igihugu.

Uyu munsi ubwo ari bube agaragara imbere ya rubanda ngo biraza kugaragara niba koko akunzwe n’abaturage nk’uko bikekwa.

Kuva mu 1998 ayoboye FNL yahoze ari FNL-Parpehutu, mu 2009 yemeye gushyira intwaro hasi iba ishyaka rya politiki iza muri Leta.

Uyu mugabo Rwasa nubwo agarutse avuye mu ‘kinyegero’ akaba ashaka kwiyamamaza avugwaho uruhare mu rupfu rw’impunzi z’abanyamurenge i Gatumba mu 2004 zahitanye abagera kuri 152.

Agathon Rwasa akaba ngo ashaka gutsinda amatora ya Perezida w’u Burundi ateganyijwe mu 2015.

Muri iki gitondo ubwo Agathon Rwasa yariho yiyerena i Bujumbura yakiriwe n'abatari bacye/ photo Thijs Van Laer

Muri iki gitondo ubwo Agathon Rwasa yariho yiyerekana i Bujumbura yakiriwe n’abatari bacye/ photo Thijs Van Laer

JP GASHUMBA
UMUSEKE.RW

%d bloggers like this: