Covid-19 'ishobora' kwandurira mu mibonano mpuzabitsina | | UMUSEKE
  • 05/08/2020 10:11 58

Covid-19 ‘ishobora’ kwandurira mu mibonano mpuzabitsina

Mu bushakashatsi baherutse gukorera ku masohoro y’abagabo 38 bari baherutse gukira icyorezo cya coranavirus, abahanga bo mu Bushinwa basanze amasohoro y’umwe  ku bantu batandatu bagize bariya bapimwe yifitemo ubwandu bwa covid-19.

Abahanga bavuga ko covid-19 ishobora kwandurira no mu mibonano mpuzabitsina

Ku bahanga bamwe ngo ibi nta gitangaza kirimo kuko n’amasohoro y’abagabo banduye Zika na Ebola basanzemo ubwandu bwa ziriya ndwara.

Gusa abahanga bo mu Bushinwa birinze kwemeza ko coronavirus yandurira mu mibonano mpuzabitsina ariko bavuga ko ‘nabyo bishoboka.’

Bavuga ariko ko byaba ari iby’ubwenge umuntu wakize cyangwa uri gukira coronavirus yirinze imibonano mpuzabitsina mu gihe runaka kugeza ubwo bizagaragara neza ko yamushizemo burundu.

Kugeza ubu abantu miliyoni 3.7 nibo banduye iriya ndwara, muribo abarenga 250 000 bakaba barayikize.

Abaganga bo mu Bushinwa bakoreye buriya bushakashatsi mu bitaro byihariye bigenewe kuvura abarwayi ba covid-19 biri ahitwa Shangqiu mu Ntara ya  Henan.

Abapimwe bari bafite hejuru y’imyaka 15 y’amavuko, bakaba baranduye hagati y’italiki 26, Mutarama na 16, Gashyantare, 2020.

Muri aba 38, abagera kuri 15 bari barembejwe na kiriya cyorezo, ariko abandi bari baragikize.

¼ cy’abapimwe basanze mu masohoro yabo harimo ubwandu bwa coronavirus, ariko icyatangaje kandi kigashishikaza abahanga ni uko 8.7% bya bariya bayisanzwemo ari abigeze kuyirwara bakayikira.

Aba bafite hagati y’imyaka 20 na 50 y’amavuko.

Umuhanga wayoboye abandi baganga muri ubu bushakashatsi witwa Dr Diangeng Li avuga ko bitinde bitebuke, abantu bazabona ko coronavirus ishobora kwandurira no mu mibonano mpuzabitsina.

Dr Diangeng Li akora mu bitaro bikuru by’Ingabo z’u Bushinwa byitwa Chinese People’s Liberation Army General Hospital biri  Beijing.

Avuga ko icyo gihe bizaba ngombwa ko gukoresha agakingiro no kwifata bikomeza guhabwa agaciro kurusha uko bisanzwe.

Undi muganga wo muri Kaminuza ya Edinburgh witwa Professor Richard Sharpe nawe avuga ko hari ibyago byinshi ko covid-19 ifite ubushobozi bwo kwandurira mu mibonano mpuzabitsina.

Ati: “ Nshingiye ku bikubiye muri buriya bushakashatsi nanjye nsanga hari ibyago by’uko covid-19 yakwandurira mu mibonano mpuzabitsina binyuze mu masohoro.”

Avuga ko iriya ndwara iramutse yandurira muri buriya buryo byaha abantu ubundi buryo bwo kuyirinda harimo kwifata no gukoresha agakingirizo.

Ishami ry’Umuryango w’abibumbye ryita ku buzima, WHO, rivuga ko niba Zika na Ebola bishobora kwandurira mu mibonano mpuzabitsina, hari ibyago ko na covid-19 yakwandura binyuze muri iyo nzira.

Daily Mail

Jean Pierre NIZEYIMANA

UMUSEKE.RW

 

Subiza

Your email address will not be published. Required fields are marked *