Diamond ati “nta mugore ngira na Zari ni umukunzi”

Mu kiganiro n’abanyamakuru Diamond yavuze ku bikorwa yajemo mu Rwandaagaruka no ku cyo yabajijwe cy’uko agira abagore benshi maze we ati “njye nta mugore ngira na Zari si umugore wanjye ni umukunzi wanjye”.

Diamond na Zari ntabwo barashyingiranwa hari amakuru ko bafite ubukwe muri uyu mwaka

Diamond ubu ari mu bahanzi bakunzwe cyane muri Africa, yageze mu Rwanda mu gitondo uyu munsi, asura ikigo Jordan Foundation muri uyu mugoroba aganira n’abanyamakuru.

Yavuze ko yaje mu Rwanda mu bucuruzi, harimo gushaka inzu azagira urugo rwe mu Rwanda akajya aza kuharuhukira.

Iby’ubucuruzi yazanye ni ukongerera ingufu ubucuruzi bw’ubunyobwa bwitwa “Diamond Karanga” n’umubavu we witwa “Chibu” ndetse mu minsi iri imbere ngo arashinga Studio ya muzika i Kigali.

Yavuze ko ubucuruzi bwe mu Rwanda  buzamuha inyungu we ariko bukanaha inyungu abanyarwanda kuko buzaha akazi urubyiruko rw’u Rwanda, kuri we ngo ni inyiturano ko n’urubyiruko rw’u Rwanda rukunda muzika ye.

Diamond yabajijwe iby’imibereho ye cyane cyane ibye n’abagore n’abakobwa bivugwa cyane mu itangazamakuru iwabo no mu karere.

Nko gusobanura impamvu zabyo, Diamond yasubije ko nta mugore agira cyakoze afite  umukunzi ariwe Zari babyaranye kabiri.

Ati “ Njye nta mugore ngira mu byumve neza, naho kubyara byo Imana yaravuze ngo tubyare twuzure Isi twororoke, abo bana bandi abantu baba bavuga sinzi aho babikura ubu njyewe mfite abana babiri gusa nabyaranye n’umukunzi wanjye nkunda cyane  Zari”.

Diamond yamuritse ibikorwa by’ubucuruzi bwe mu Rwanda; Parfum, ubunyobwa (karanga) na studio ya muzika

Diamond yavuze ko muri Tanzania ubu yashinze TV na Radio bye abwira abahanzi bo mu Rwanda ko badahejwe kuyigezaho ibihangano byabo bakabimenyekanisha.

Ejo kuwa gatandatu Diamond ngo azatemberera mu isoko rya Nyarugenge asuhuze abafana be, nahava ajye i Nyamirambo kuramutsa abaho maze ajye kurambagiza inzu bamurangiye arebe iyo ashimamo azagura ikaba iye.

Bonaventure KUBWIMANA
UMUSEKE.RW