DRC: Urukiko rwemeje ko Tshisekedi ariwe watsinze amatora y’Umukuru w’igihugu

 N’ubwo abakuru b’ibihugu baherutse mu nama idasanzwe yo kwiga ku kibazo cyakurikiye ibyavuye mu matora y’Umukuru w’Umukuru w’igihugu basabwe Urukiko rushinzwe kurinda Itegeko nshinga muri DRC kuba ruretse kwemeza uwatsinze amatora, uru rukiko rwaraye rwemeje ko Félix Tshisekedi ari we wayatsinze bidasubirwaho.

Urukiko rushinzwe kurinda Itegeko nshinga rya Repubulika iharanira Demukarasi ya Kongo rwemeje ko uyu mugabo ari we watorewe kuyobora iki gihugu

Biteganyijwe ko kuri uyu wa Mbere taliki 21, Mutarama, 2019 ari bwo itsinda ryashyizweho na AU riyobowe na Perezida Paul Kagame rizagera i Kinshasa kuganira n’impande zose zirebwa n’ikibazo cy’ibyavuye mu matora  bitavugwaho rumwe.

Abakuru b’ibihugu byateraniye muri iriya nama ya AU bari basabye kandi Komisiyo y’amatora yigenga ya DRC kuba iretse gutangaza burundu ibyavuye mu matora yabaye taliki 30, Ukuboza, 2018.

Félix Tshisekedi yari yatangajwe n’iyi Komisiyo ko ariwe watsinze amatora ku majwi angana 38, 57 % agakurikirwa na Martin Fayulu wabonye 34, 83 %.

Uyu yanze kwemera ibyavuye mu matora, avuga ko habayeho kwibira amajwi Tshisekedi.

Kuri uyu wa Gatandatu, Perezida w’Urukiko rushinzwe kurinda Itegeko nshinga Benoît Lwamba Bintu yatangaje ati: “Félix Tshisekedi niwe Urukiko rwemeza ko yatsinze amatora y’Umukuru w’igihugu.”

Uruhande rwa  Martin Fayulu rwari rutegereje ko Urukiko rurinda Itegeko nshinga rutesha agaciro ibyavuye mu matora rugategeka ko habaho kungera kubarura amajwi.

Ikibazo abasesenguzi bibaza ni ukumenya niba abakuru b’ibihugu by’Africa bari bukomeze gahunda yabo yo kujya muri DRC kuganira kuri kiriya kibazo, cyangwa bari bukirekere abaturage ba DRC?

Perezida ucyuye igihe Joseph Kabila aherutse gusaba abaturage ba DRC n’ab’isi muri rusange kumva kandi bakemera ko Félix [Tshisekedi] ariwe uyobora DRC.

Jeune Afrique

Jean Pierre NIZEYIMANA

UMUSEKE.RW