Ese ninde ubeshya undi? – UMUSEKE
RALC Ntibavuga bavuga

Ese ninde ubeshya undi?

Ninde ubeshyera undi hagati ya Leta n’abatavugarumwe nayo?

Abanyarwanda, abari hanze n’abari imbere mu gihugu bibaza byinshi ku bivugwa ku Rwanda, bamwe mu banyarwanda bari hanze y’u Rwanda usanga bavuga ko mu Rwanda ibintu byacitse, inzara yishe abantu, ibisasu bihitana imbaga, ngo uburenganzira bwa muntu ntibwubahirizwa, amashyaka atavuga rumwe na leta arakandamizwa, ngo mu Rwanda hari ibibazo bikomeye by’amoko, bakona abagabo n’ibindi byinshi bibi. Ese uba mu Rwanda wakwemeza ko aya mahano ariyo?

Mu Rwanda uhari ahabona umutuzo, iterambere rifite umurongo ngenderwaho n’ikerekezo, ikoranabuhanga, umutekano utuma n’abashoramari bifuza gushora utwabo mu Rwanda, amatora akorwa mu mucyo n’ubwisanzure, gahunda zitandukanye zigamije amajyambere y’abaturage mu cyaro, ingamba shya mu buhinzi, kubaka ubutabera bubereye buri wese, imiyoborere myiza ishyirwamo imbaraga. Umuntu uri mu Rwanda niyo atabona ibi ntiyabura kubona amahoro ntabone ubwicanyi bavuga, ntiyabura kubona imibanire myiza y’abantu idashingiye ku moko itandukanye n’amakimbirane bavuga, isuku mu gihugu n’ibindi bigaragarira amaso bidasaba ubushishozi cyangwa irindi jisho rireba kure cyane.

Iyo urebye ibyo Leta y’u Rwanda ivuga ko igamije kugeza ku Rwanda, ukanareba abatavuga rumwe na Leta ya Kigali ibyo bavuga ko bitagenda mu Rwanda, nk’umunyarwanda wibaza ubeshya cyangwa ubeshyera undi?

Gusa iyo nanone urebesheje amaso y’umutima usanga hari ibyo wavugako bamwe babeshyera abandi, nonese koko mu Rwanda hari imyiryane y’amoko? None se koko mu Rwanda abantu baricwa buri munsi? None se koko mu Rwanda abagabo barakonwa? None se ni byo ko mu Rwanda hatari ubwisanzure? Ni koko se mu Rwanda abantu bishwe n’inzara?

Njyewe ndi mu Rwanda, koko mu Rwanda hari ibibazo mu burezi, mu mibereho myiza, hari amakosa ashobora gukorwa mu butabera abantu bakaba barengana, ruswa, ibibazo by’imiturire n’ibindi n’ibindi. Gusa ibi bibazo ni ibibazo n’ubundi bitari umwihariko w’u Rwanda. Byatungurana kumva ko mu Rwanda, kimwe mu bihugu biri mu nzira y’amajyambere, abantu batuye neza, abantu babeshejweho n’amadolari 50$ ku munsi, abantu bose biga kugera muri za kaminuza n’izindi nzozi nziza nyinshi. Niyo mpamvu ibi bibazo leta y’u Rwanda n’izindi leta zitari nke muri Africa ziba zirwana nabyo, u Rwanda rukaba kimwe mu bihugu ntangarugero mu gukemura ibibazo nkibi, ibi n’ibyemezwa n’inzobere mw’iterambere nka PNUD, DFID n’indi miryango idafite aho ibogamiye.

Iyo urebye usanga mu byo bamwe babeshyera abandi, byaba ari ukwigiza nkana no gushaka gusubiza u Rwanda mu myaka hafi 17 ishize. Ishingiro ry’iterambere ni Amahoro n’umutekano u Rwanda rumaze kwihaza muri byo. None se wowe niba uri mu Rwanda, warahageze vuba aha, cyangwa ufite abavandimwe, inshuti se baguha amakuru ku Rwanda wavugako ari nde ubeshyera undi ?

Ubwanditsi
Umuseke.com

%d bloggers like this: