Gasabo: Kompanyi iregwa n'abakozi 90, yabwiye urukiko ko ishaka inzira z'ubwumvikane | | UMUSEKE
  • 22/10/2020 12:09 00

Gasabo: Kompanyi iregwa n’abakozi 90, yabwiye urukiko ko ishaka inzira z’ubwumvikane

  • Kompanyi yitwa Afriprecast iraregwa kutubahiriza amasezerano n’abakozi
  • Ngo yakozweho na COVID…Abayirega bakavuga ko ikibazo ari icya kera,

Kompanyi y’Ubwubatsi yitwa Afriprecast uyu munsi yitabye Urukiko Rwisumbuye rwa Gasabo kugira ngo iburanishwe ku kirego iregwamo n’abantu 91 bavuga ko itubahirije ibikubiye mu masezerano y’umurimo bagiranye na yo, yasabye igihe kugira ngo ikemure iki kibazo mu nzira z’ubwumvikane.

Bamwe mu bakozi barega iyi kompanyi bari baje kwiyumvira uru rubanza

Mu cyumba cy’Urukiko, hari harimo abantu barindwi n’abunganizi bane ku mpande zombi, mu rwego rwo kwirinda ubucucike kubera icyorezo cya COVID-19.

Umucamanza yabwiye uhagarariye iriya Kompanyi iregwa ibyaha ishinjwa birimo kudakurikiza amasezerano yagiranye n’abakozi ndetse no kubirukana mu buryo bunyuranyije n’amategeko.

Umwunganizi mu by’amategeko w’iyi Kompanyi iregwa ya Afriprecast, yasabye ko urubanza rusubikwa, agaragaza ko iyi Kompanyi ifite ubushake bwo kumvikana n’abakozi, bityo ko ihawe igihe kitarambiranye yaba yamaze kwikiranura na bo.

Yavuze ko iyi Kompanyi ari nshya ikiyubaka, bityo ko na yo yagizweho ingaruka n’icyorezo cya COVID-19, ariko ko ifite ubushake bwo gukemura iki kibazo mu nzira z’ubwumvikane.

Uwunganira abarega yavuze ko n’ubwo iyi kompanyi isaba guhabwa igihe,  ngo n’ubundi byageragejwe ariko ntibigire icyo bitanga ndetse ko byabaye mbere y’iki cyorezo cya COVID iri kugira urwitwazo.

Avuga ko ibi ari uburyo bwo gutinza urubanza, kuko igihe cy’ubwumvikane cyabayeho bikananirana, bityo ko urubanza rwaba, Afriprecast yabasha gukemura ikibazo umwanzuro ugashyikirizwa Urukiko mbere y’isomwa ryarwo.

Nyuma yo kumva impande zombi, Urukiko rwanzuye ko ikifuzo k’iyi Kompanyi cyubahirizwa, ruyisaba ko ikemura ibibazo bafitanye bitarenze muri Nzeri uyu mwaka, hagera nta ntambwe iraterwa urubanza rukazaburanishwa nta yandi mananiza.

Urukiko rwanzuye ko iyi kompanyi ihabwa umwanya ikumvikana n’abakozi bayo, bitagerwaho urubanza rukazaba ku itariki ya 6 Ukwakira 2020.

Mu mpera za Kamena uyu mwaka, Umuseke wakoze inkuru ya bamwe mu bakozi ba Kompanyi y’ubwubatsi ya Afriprecast banenga imikorere yayo harimo kutita ku bakozi bahuye n’impanuka bari mu kazi.

Bavugaga ko abakoresha bayo batubahirije ibiri mu masezerano y’akazi, Ushinzwe abakozi muri iyi Kompanyi yavugaga ko ibyo bayishinja ari ibinyoma.

Afriprecast ni uruganda rukora inkuta n’inkingi z’inzu ndende, inkuta barambika ku biraro no ku nzu zikomeye.

Dieudonne NSHIMIYIMANA
UMUSEKE.RW

Subiza

Your email address will not be published. Required fields are marked *